另類家長港足保長

man36951 · 發表於 2011-12-27 22:50:51

香港青訓難搞，皆因學踢波同讀書難以並存，家長反對個仔掛住踢波影響學業，多年來幾多「明日之星」同「港隊希望」都因為升學問題而埋沒咗，不過近年情況有變，出現一批想捧個仔做球星嘅家長，甚至送個仔去英國寄宿學校踢波都有。

青訓班變親子活動
近年本地足球嘅青訓班變成親子活動，家長由反對個仔踢波變成瞓身支持，對香港足運發展絕對係好事，近期更有一批家長，索性送個仔去英國讀寄宿學校，再投考英超球會嘅青訓系統，希望捧個仔做英超球星。

社會上統稱過分寵愛子女嘅家長為「怪獸家長」，但支持仔女踢波嘅家長就絕對唔係「怪獸」，反而佢哋係最明白事理，最肯為兒子着想嘅一群。

呢班「另類家長」認為，如果囝囝希望喺體育運動有一番作為，六至十六歲係最重要嘅發展階段，因此佢哋傾向安排仔女自幼接受專業體育培訓，到個仔十六、七歲，就算做唔成職業運動員，到時再安排仔女升學都未遲。