|
|
今季雖係「鳳凰計劃」展開前嘅「末代港甲」，但唔代表隊隊都喺度等收工，一樣有球隊不斷創新，搞搞新意思，其中表表者非組軍最積極、變化最大嘅晨曦莫屬，睇佢哋一口氣加咗兩個冠名贊助，成為日之泉JC晨曦，Logo亦重新設計過就知，而佢哋由甲組陣容至青年梯隊都不斷強化，又成立足球學校免費教波，加埋球迷會同步啟動，由上至下都嚟個大革新，務求以至In形象同球迷見面。而屯門全面東歐化同部分Ｕ21球員化身甲組新軍港菁，亦開創新局面。
屯門東歐強化版上架！
地區球隊屯門上季成功在港甲企穩陣腳後，升班第二季亦強勢出擊，聘請前傑志、大中教練狄恩，率領塞爾維亞兵團作戰，以東歐強化版全新亮相。
屯門上季將屯門鄧肇堅運動場嘅主場威力盡情發揮，平均主場入場人數接近一千人，入座率僅次於巨型班南華，今季塞爾維亞教練狄恩上任，帶領多位同鄉美亞、美高、美奇及新援力高比賽，更是如虎添翼，球隊今季除咗靠拚勁搶分，相信會有更多東歐技術同戰術成分提供畀球迷欣賞。
港菁青訓搞大佢！
由於乙組亞軍港迪臨時放棄升班，足總通過由各甲組球會借出旗下2013東亞運適齡球員（U21），組成港菁頂上，呢隊波同早幾年嘅「香港08」有啲唔同，因為請咗外籍教練，仲有三個外援帶住，以青訓嚟計，都算係大搞！
當年參加甲組嘅香港08，係由足總幾位高層合資經營，據講球員月薪最低只得四千，至於呢隊港菁就唔係咁搞，負責人話首年班費係四百萬，部分球員由幾間大球會借出，月薪至少都有七千，以前踢過愉園同快譯通嘅前澳洲青年軍教練科士打同三個外援，包括飛馬借將麥保美同西班牙外援艾斯古尼利，人工都幾貴o架！
番外篇：裁判的新衣！
裁判球衣今季亦會「創新」！足總昨宣布今季甲組賽事，裁判服裝獲得Lotto Sport香港代理商「加豪體育用品有限公司」贊助。另外，足總亦決定派出大港腳出戰9月底喺高雄舉行嘅龍騰盃。 |
|
在線雷達
發表於 2011-8-31 20:00:10
廣播
置頂
推舊帖
收嗲鳥
油顏色
