這個殺手真太似 Enterbay 1/6 Leon

vanhelsing · 發表於 2011-8-12 22:43:21

本帖最後由 vanhelsing 於 2011-8-12 22:46 編輯

職業殺手，永遠被抹上浪漫色彩，相關電影亦拍極唔完，不過當中Best of the Best就只有兩部—亞倫狄龍主演嘅《獨行殺手》，同埋由Luc Besson執導嘅《這個殺手不太冷》（The Professional），後者仲一手捧紅主角Jean Reno，當年亦令今天已貴為影后嘅Natallie Portman嶄露頭角。咁經典，好多Figure玩家早就想據為己有，Enterbay終於一圓大家夢想，今次Leon帶埋盆栽同手提箱登場，誓要令《殺手》粉絲個個中招！
提起Enterbay，好多人只會想起李小龍，其實自從新版《死亡遊戲》之後，其Hollywood Classic引擎已正式啟活，《這個殺手不太冷》只係頭炮，日後仲有《Scarface》、《Terminator 2》及《Rambo》等電影Figure排住隊上，實行挑戰Hot Toys嘅MMS系列。貴為頭炮之作，生產Leon就用咗足足1年時間，Enterbay負責人解釋道︰「呢套電影係十分經典，我哋老闆都好鍾意，所以希望慢工出細貨，做到我哋、Jean Reno及玩家3方面都感到滿意先派貨。我哋都好慶幸趕得切喺動漫節時推出，等大家暑假有新Figure玩！」

逼真眼神  多次審批慢工，主因用喺頭雕上，雖然已經由大師Y.J.Park落刀，但係都要經過多次審批先Pass，例如當初雙眼係向前望，依家就成稍為向斜望，以表達角色略帶迷離嘅眼神。實物所見，若果跟坊間玩家DIY嘅作品比較，神似度真係高好多，起碼一眼就認出係Jean Reno，特別係戴埋墨鏡及針織冷帽後，好似真人上身咁款。遺憾係E記暫時未有將呢個頭雕放埋喺《鬼武者》系列嘅打算，否則就可以同金城武湊成一對。

全新素體  配件周全電影中Leon勁多動作場面，Figure特別採用最新嘅RM4 ABS可動素體，提供超過30個關節，擺咩揸槍甫士都話咁易。服飾方面，跟足原著有齊黑白兩件長袖T恤、深灰色毧大衣、吊腳褲及深啡色皮鞋，除低大衣後仲有仿皮工作背心，用嚟攜帶武器及各式殺手工具，可惜冇送多對白襪，否則就更完美。配件亦相當大堆頭，手榴彈、匕首等武器唔在講，左輪加曲尺等6把短槍都可以放入仿皮手提箱內，當然角色嘅招牌道具，包括盆栽、牛奶同牛奶盒都一併奉上，論配件心思拍得住之前嘅《死亡遊戲》。

查詢︰2332 3615（Enterbay）

Gilbert

Enterbay 1/6《The Professional》Leon（RM-1031）
零售價︰$1,480

頭雕經過多次修改，眼神略帶迷離，捕捉到角色神髓。

墨鏡及冷帽造型勁似Jean Reno，又會否令你想起星爺的《回魂夜》？

大衣後係仿皮工作背心，提供大量小口袋，大鉸剪都放得入。

皮鞋顏色、摺痕同真鞋冇咩分別，而且跟足角色設計埋吊腳褲。

附件相當周全，淨計手掌都有5對之多。

手提箱設有多層暗格，可放Ruger SP101、Beretta 92FS等6把短槍。

採用RM4 Body，關節多多，想擺咩甫士都得。