青心直說：跌下來　買上去

dunk397 · 發表於 2010-4-1 13:29:31

談戀愛嘅，梗係想轟轟烈烈，「吻下來，豁出去」，咁先叫做真愛；炒股票嘅，無非係想食一次勁嘅，所以唔少人鍾情「跌下來，買上去」。不過，投資者經常會好迷失，跌下來萬一買唔番上去點算？若買中「跌下來，再跌下去」嘅股份，輸價更輸機會成本，得不償失。
為免越撈越低，投資者首要了解係隻股嘅行業前景，跟住睇清估值，係咪已回到較合理水平；最實際係睇股息率，跌到有兩三厘防守性就更高。有時會從中發現意外驚喜，早前寶龍地產（ 1238）跌至兩蚊邊緣時，筆者就係咁搵到佢，計落可能會派成 6厘息咁多，再跌都跌唔落。
投資者往往只睇圖作部署，近期失敗例子係騰訊控股（ 700），個個都望住 150蚊跌唔死有得彈，買入窩輪博大槓桿。大戶同樣睇到呢啲平均線嘅支持/阻力位，技術陷阱有咁似整到咁似，結果騰訊跌下來等大家上晒車，股價冇得即彈，入咗貨嘅輸時間值輸引伸波幅仲輸埋士氣，認真無謂。

恒地股證唔似搵笨
大市 21500關牢不可破，撈底趁壞消息入市，勝算更高。例子有遠洋地產（ 3377），七連陰後再加多單央企唔准搞地產副業嘅壞消息，結果大步檻過冇事，睇實國壽入股價撈底就更有信心。另一隻講完即配股嘅威靈控股（ 382），好有誠意咁跌下來接投資者上車，一日就已消化不利消息，類似嘅走勢，喺保利香港（ 119）早前配股都出現過。
四叔宣佈發認股證，恒基地產（ 012）急跌。媒體同大行都話冇理由要變相供股 249億元咁多，寫到搵股東笨咁款。睇清楚認股證條款係一年期、行使價 58元。換轉係坊間輪商，會同你講呢隻輕微價外價好值博，理由好簡單，股價喺期內務必要升穿 58蚊變價內，股東先有誘因去行使，咁至可以成功集資。大股東四叔都分咁多，唔通會搵自己笨咩！
胡孟青