青心直說：大行發功上落車要小心

royliu

大行報告不能不睇，卻不能盡信，要跟報告出入極考功夫，因由開筆寫到被傳媒廣泛報道，唔係大客仔，其實已係第二三手消息，跟入往往變成高追，捱價輸機會成本就唔抵。
近期最佳例子係騰訊控股（ 700）同中國移動（ 941），大行睇法唔差，多維持買入。大摩夠膽死畀騰訊 192元目標價，結果業績果然符合預期，但跟入結果即吃眼前虧，股價兩日急跌一成。仲有更經典係中移動入股浦發銀行，大摩帶頭話公司不務正業，及後中移公佈業績好過預期，一眾大行施展「變臉」特技，轉軚將中移列入買入名單。
唔少散戶聽大行支笛，正正喺最靚嘅低位沽晒啲貨，到大行出報告唱好又再買番，結果係「左一巴，右一巴」俾人摑到啪啪聲。講到大行好衰但都有例外，例子有澳門賭業股，雖然要小心濠賭股「短癮」的特性，但若跟瑞信買入澳博控股（ 880），至少跌市中仍有不錯嘅抗跌力，條氣都冇咁頂住。


假設越樂觀　越要打折
所以投資者解讀大行報告，有幾點要留意。第一，勁嘅經紀可以攞到正式報告慢慢睇，因為傳媒每日要喺短時間內處理幾十個報告，報道之間內容難免有出入，當呢啲誤差資料再被其他傳媒「加工」，中港兩邊走時，好易走晒樣；第二，留意分析員係咪有份量，同以往嘅準繩度有幾高；第三就要睇清楚大行嘅目標價係基於乜嘢假設而定，假設越樂觀，要打嘅折頭就要越多。
最近高盛出報告大讚華寶國際（ 336），重申買入評級。其實該行早喺去年 12月 15日已首次叫買入，目標價睇 10.2元，當時股價即日炒高收到 8.10元以上，之後股價亦有表現，皆大歡喜。呢次報告只係簡單兩段，話同管理層見過面，重申睇好股份，認為有併購機會，目標價冇變，仲寫明叫人唔好高追，因為只得 14%水位。
市場懶理大股東喺去年先後兩次大手減持，目前仍持有逾半股權，其他基金股東揸近兩成。以咁嘅往績，我係股東都趁高套現，反正報告寫明叫客戶趁低至買，既然買家咁盲目認報告唔認價，輸錢抵死唔好嗌阿媽。
胡孟青

沉默小言

大行根本信唔過, 好似呢個財演都係信唔過的

dull169

多謝分享