蔡思貝宣布正式離巢TVB 感恩13年樂與苦帶來成長養分：隨時候命

GIRLAV · 發表於前天 11:57

蔡思貝近年屢傳遭TVB雪藏及離巢疑雲，除咗IG個人簡介中刪除咗原本TVB經理人聯絡方式，有網民於2月尾發現TVB官網已搜尋唔到蔡思貝，疑似正式離巢，不過蔡思貝未有透露任何消息。直至3月12日，蔡思貝於社交平台發文證實正式離開效力13年嘅TVB。

蔡思貝於社交平台形容過去13年係一段重要嘅人生旅程：「十三年旅程，圓滿修畢」」，並以「告別溫室，樹木正式移植曠野」表示自己已離開熟悉環境，未來會以演員身分繼續努力：「舊雨新知，請多多指教。我是演員蔡思貝。」同時，蔡思貝向TVB表達感謝，指多年來喺公司經歷嘅高低起跌都成為佢成長嘅重要養分，又提到隨時準備再次參與TVB嘅工作：「感謝TVB給予的一切，樂與苦，都是我珍貴的養分。這份情誼，也將延續下去，日後若有合適的機遇，隨時候命。」蔡思貝亦感謝一路以來提攜與照顧佢嘅人，包括高層樂易玲、曾勵珍、曾志偉，以及多位監製、導演、經理人和幕後團隊。唔少藝人朋友和網民都留言表達支持，林盛斌（Bob）更留言：「江湖再見啦❤️All the best」。網民又祝願蔡思貝可以有更好嘅發展，指蔡思貝值得擁有更好嘅機會：「加油👏，c貝係tvb我唯一收看的女藝人」、「世界那麼大，總會有自己嘅位置。更加值得擁有。青春有限」、「演員蔡思貝在新嘅階段會越來越順，期待你新嘅作品🥰forever love you」、「祝福你，明天會更好」、「期待另創新天地」等等。

蔡思貝於2013年參加港姐並獲得亞軍，入行3個月就被安排入劇組演出《八卦神探》，而且唔係閒角。蔡思貝好快就備受TVB力捧，甚至跳過「飛躍女藝員」獎項，2017年以《踩過界》癲姐一角獲得「最受歡迎女角色」，更於2020年再以《踩過界II》榮登視后。但高峰過後無以為繼，蔡思貝演出作品量明顯減少，上一部劇集已經係2024年播出嘅《飛常日誌》，近年曝光率近乎零。