|
|
74歲鄭則仕（Kent哥）去年於社交平台分享近況，身形明顯消瘦許多，唔少網民表示擔心其健康狀況。鄭則仕就此澄清，表示自己為健康着想而減肥，從270斤減到200斤。早前，鄭則仕參加渣打香港馬拉松，由周潤發（發哥）帶領下與鮑起靜和劉江齊齊完成10公里賽事，令網民感驚喜，更封佢為「則仕Do It」。日前鄭則仕拍攝影片分享跑步嘅心路歷程，並公開感謝周潤發。
鄭則仕分享開始跑步嘅原因，坦言一年前飽受膝蓋痛楚折磨，連落樓梯都寸步難行：「每下一階都痛到不行，我甚至懷疑為何這種痛要落在我身上。」醫生當時就建議佢每隔4至6個月注射藥物鎮痛。鄭則仕透露，周潤發得知情況後主動提出跟佢去跑步，鄭則仕回憶當時第一反應就係懷疑：「膝頭痛去跑步？得唔得㗎？你開玩笑吧？」表示就連身邊朋友亦唔相信膝頭痛可以跑步，換來連串嘲諷。不過鄭則仕最終決定加入周潤發嘅跑步團並進行特訓。
鄭則仕憶述第一次跑步嘅情況，指自己跑咗兩分鐘就已經腳痛到想停下，周潤發則從旁鼓勵及指導呼吸及慢跑技巧：「不要放棄，可以慢，但不能停。痛是過程，你要學會控制它，而不是被它控制。」鄭則仕表示︰「軍令如山，師命難違。」加上唔想白費對方一番苦心而堅持落去，經過幾個星期訓練已經可與膝蓋痛並存，而家仲已經唔痛：「哇，它沒有打敗我，到現在我的膝蓋已經不痛了，我很開心，我師父更開心，因為他真的幫到我，證明他是對的。」
渣打馬拉松當日，周潤發特意跑喺鄭則仕身後，陪佢見證衝線一刻。鄭則仕對周潤發表達感謝之意：「今年74歲，從來冇接觸過跑步這項運動，從零開始到完成10公里，用了十個月。」、「特別特別要感謝我的師父（周潤發），在他的指導監督下，才能完成今天的夢想。」 鄭則仕續指，自己依然不喜歡跑步呢個運動，但會一輩子跑下去，又指從中領悟出人生哲理：「原來有些東西我們需要的，必須把它做好才有效果，我需要這個效果，我不會放棄它。」 |
|
在線雷達
發表於 
廣播
置頂
超級提昇
強效提昇
推舊帖
收嗲鳥
油顏色
