梁競徽為賀歲片賣樓當製作費表示唔收得要瞓街陳山聰捐出片酬仗義幫忙

GIRLAV · 發表於 2025-8-23 12:33:30

近年香港電影市道低迷，除咗有戲院結業之外，港產片開戲亦困難。而梁競徽（唯唯）就與陳山聰、林盛斌（Bob）及伍詠薇（伍姑娘）等人前往馬來西亞拍攝賀歲片《媽的又要嫁》，梁競徽首次身兼電影編劇，仲賣樓當製作費，仲話如果唔掂就要瞓街。

《媽的又要嫁》喺8月19日在吉隆坡舉行開鏡拜神儀式，一班台前幕後團隊都著上印有戲名嘅紅色T恤，祈求電影拍攝順利。喺《媽的又要嫁》中，伍詠薇將飾演媽媽嘅角色，而佢兩個仔就係陳山聰及阿Bob，而唯唯就系飾演兩兄弟嘅好朋友。伍詠薇表示得知仔仔係陳山聰及阿Bob時感到愕然，不過當知道馬來西亞靚仔演員馮瑋佺（Daniel）飾演佢老公時，佢就即刻開心返晒。之後陳山聰表示佢飾演伍姑娘個仔係合理，因為大家都係靚仔靚女，不過就唔明點解有阿Bob呢個細佬，而Bob就話佢哋係靠樣，而佢自己就靠內心戲發揮。

為咗電影業界出一分力嘅陳山聰，今次係捐出片酬當投資，佢就話小小心意，因為佢同唯唯及Bob係好好嘅朋友，加上好多人話影圈係冰河期，而佢哋一直都好想拍一套可以帶俾觀眾開開心心又溫情嘅賀歲片。今年佢哋終於搵到投資者，唯唯又第一次做編劇。同時佢亦好多謝伍姑娘，因為知道佢哋製作費唔多，所以願意以友情價仗義幫忙。而梁競徽今次賣樓當製作費，希望喺影圈冰河期，香港及馬來西亞嘅演員可以一齊努力，拍一套令觀眾開心及又可以帶出珍惜家人嘅訊息畀佢哋。之後佢就話希望呢套電影收得，如果唔係就要瞓街。