李佳芯活動獻唱搣甩「魔音」稱號觀眾大叫Encore 被讚擁中學生膚質公開保養秘訣

GIRLAV

李佳芯（Ali）自離巢TVB後自組工作室，與好拍檔黎諾懿到大馬拍攝劇集《義和》，空檔期間，佢就於社交平台PO出素顏飲椰青嘅照片，被網民大讚保養得宜，就連森美都留言激讚李佳芯擁有中學生膚質。日前李佳芯低調返港，並以一身粉紅色格仔吊帶短裙出席保健品牌活動，造型養眼，即使以42歲之齡著上咁青春嘅打扮，因為凍齡外貌而毫無唯和感。

李佳芯喺活動上分享踏入人生新階段嘅心情，表示以前只係演員身份嘅時候只需演戲，感覺好幸福，而家則要兼顧好多嘢，包括未來計劃、工作室Logo等等；又指每次踏入新階段都會有自己打擊自己嘅聲音，期間會不斷鞭策同認識自己，努力計劃下一步。除此之外，李佳芯亦分享自己嘅保養秘訣，指自己其實都係盡量Keep，由於每次開工需要化妝，休息小又大壓力，皮膚會出現敏感，因此會喺冇嘢做嘅時候盡量做運動、飲食清淡、食營養補充品以及多飲水排毒；又指保持好心情都好重要，從來唔打機嘅佢近期就學識打機放鬆。

李佳芯（Ali）曾於2017年商場活動獻唱《小幸運》被網民取笑係「魔音」，仲話佢係唱緊《小噩夢》，2020年於《流行經典50年》唱《幸運是我》，聲線略為抖動，但就被指大有進步。及後李佳芯為《慈善星輝仁濟夜》再度獻唱林奕匡《一雙手》，雖然有網民覺得佢唱得冇氣冇力，但大部份網民都認為李佳芯進步咗好多，成功搣甩「魔音」稱號。李佳芯今次又喺品牌活動上獻唱歌曲《終身美麗》，唱功大躍進，被現場觀眾大叫Encore，佢分享指自己自從被網民冠上「魔音」稱號之後搵咗唱歌老師指導，又一直都有喺唱歌方面下苦功，不時唱K練習，再要身邊人畀評語，收集唔同意見務求令自己進步。

howardwo

擺脫魔音