|
|
亞視前高層盛品儒（James）在8月18日凌晨在養和醫院病逝，終年48歲。盛品儒因出任亞視執行董事而為人熟悉，原來盛品儒家族大有來頭，其祖父盛恩頤係北洋大學堂同南洋公學創始人盛宣懷嘅四公子，盛品儒父親盛毓鳳從事房地產業務，並在香港開設著名食府留園雅敘。盛品儒曾於加拿大留學，2010年其堂兄王征入股亞視成為大股東，同年7月王征任命盛品儒進入亞視董事局擔任為執行董事，其後盛品儒被指架空前朝蔡衍明時代嘅CEO胡競英，並下令行政人員要向佢匯報，自此盛品儒接掌成為亞視高層。
盛品儒出任亞視高層期間，該台發生過唔少大事，當中最轟動係於2011年7月誤報前國家主席江澤民死訊。事發後盛品儒喺立法會上否認王征操控亞視及干預新聞部，但在出席作供嘅發言後以90度鞠躬，向江澤民及全港市民道歉。通訊局後來嘅調查報告指盛品儒容許王征喺幕後控制亞視，更涉及隱瞞修改亞視管理會議紀錄，決定向亞視罰款100萬。當局認為盛品儒唔再係《廣播條例》中所指嘅「適當人選」，指示亞視要求盛品儒停止控制該台，而盛品儒就喺2013年8月31日辭去執行董事一職。
盛品儒過去曾有過不少金句，例如聲稱一度出任亞視CEO嘅王維基竊取亞視資料，因此被王維基控告佢同亞視誹謗，結果法庭判王維基勝訴，盛品儒一方需賠130萬元。而當時盛品儒指王維基拿走公司文件係「眾所周知嘅事」時，一時口誤將「眾所周知」個「周」字講成粗口。盛品儒曾被傳媒影到同吳浩康舊愛唐唐紫睿(Hazel)夜蒲，回應被指「花弗」時話「我反問過何為花弗？他們說是集高層、後生和靚仔於一身，如果以這些做標準，我承認我花弗。」
講起情史，盛品儒同過唔少名字扯上關係。唐紫睿之外，盛品儒緋聞對象仲有2004年亞姐冠軍呂晶晶、1995年落選港姐陳霽平、甚至年紀相差19年嘅亞視前藝人魏秋樺。2014年盛品儒傳出同澳門猛人周焯華（洗米華）嘅表妹蔡一鳳Michelle拍拖，但同年7月盛品儒被拍得同當時仲係靚模嘅郭奕芯喺街頭親熱，令蔡一鳳即嗌分手。盛品儒其後知衰喺facebook出post箍煲，甚至寫明I miss u Michelle。結果唔駛半個月，盛品儒又真係箍煲成功，更宣布向蔡一鳳求婚成功。二人於2014年年底註冊，翌年擺酒，但到2016年，新婚年幾嘅盛品儒被爆偷食索女Tasha，女事主更聲稱懷孕，當時盛品儒承認趁老婆公幹時約會Tasha，更自爆為此事跪玻璃向老婆認錯。「大婆」蔡一鳳就喺facebook出post為老公護駕，話「希望老公痛定思痛，我之前太忙，這位小姐才有機會不停地撩老公，希望她回頭是岸」。此後盛品儒同蔡一鳳繼續恩愛，2018年蔡一鳳為盛品儒誕下龍鳳胎。
日前有傳盛品儒病重並留醫深切治療部（ICU），蔡一鳳透露老公正在與病魔搏鬥，到周日回應傳媒查詢時，承認丈夫未過危險期，仍在ICU留醫，身體十分虛弱，但已經較為清醒，而且可以表達自己。當時有傳盛品儒確診末期肝癌，體重急跌至70磅，身上插滿喉管。蔡一鳳未有否認盛品儒是否罹患肝癌，但稱不想公開病情。 |
|
在線雷達
發表於 
廣播
置頂
推舊帖
收嗲鳥
油顏色
