黃翠如獨力湊B頭髮凌亂好憔悴 好友洪永城： 你搞唔搞得掂呀？

GIRLAV

黃翠如與蕭正楠2018年結婚，今年3月誕下愛情結晶品「蕭哈哈」，轉眼間蕭哈哈已經4個幾月大，一家三口幸福美滿。日前黃翠如喺社交網站出PO，大呻自己做「湊仔婆」獨力湊BB，而老公蕭正楠就喺澳州風流快活地拍攝節目。

黃翠如不時喺社交網站分享湊B日常，日前佢上載自己抱實「蕭哈哈」嘅照片，而另一張就係佢頭髮凌亂嘅憔悴樣，之後寫話：「六年前嘅今日，我喺澳洲拍節目活著Viva ，佢喺屋企凌亂咁將啲隔夜Pizza塞入口。六年後嘅今日，我身上面長時間掛住咗一隻樹熊，佢去返同一個地方拍節目活著Viva。人生🌈」

雖然黃翠如貌似埋怨老公，不過依然閃盲網民，隨即引起網民留言，不過最搞笑嘅留言就係嚟自好友洪永城，佢搞笑話：「你搞唔搞得掂呀？ 好似有啲困難」，貌似想取笑黃翠如，不過就被網民留言圍攻佢，例如「咁你快啲去幫手」、「大家都半斤八兩」、「你一家過嚟幫吓手啦，Amber應該可以湊下細佬嘅」及「使唔使去幫下手」。