郭錦恩罕有接受訪問談近況 淡出娛圈多年任港大教授

GIRLAV

現年59歲嘅永安百貨創辦人郭泉曾孫女郭錦恩（Crystal），喺1987年當選華埠小姐，之後嚟香港加入嘉禾電影公司，參與多套電影拍攝，例如《飛龍猛將》、《警察故事2》、《四千金》及《黃飛鴻之龍行天下》等等。佢喺1989年與呂良偉因合作《四千金》而撻著，不過拍拖兩年便分手收場；而佢喺1999年與大學同學Richard結婚，並先後誕下三子，其後更返回美國。久未露面嘅佢曾任職導演、清談節目主持及大學導師，日前罕有地現身《流行都市》接受訪問，期間大談近況及分享經歷。

淡出幕前嘅郭錦恩，喺被問到近況時，佢就表示自己返香港以表演研究博士身份到香港大學教書：「我喺2014年離開香港去美國，我喺夏威夷定居住咗10幾年，不過嗰度好悶呀，咁我咪去讀書，我攞咗個博士咪返嚟教書。」之後佢就話自己好鍾意忙，仲話佢啱啱嚟香港做嘢嘅時候，佢爸爸叫佢磨利一把刀，不過佢話唔可以，因為佢嗰啲叫瑞士軍人刀，係要萬能同一時間可以做幾樣嘢，佢好鍾意充實同挑戰自己。

被問到家庭及工作如何平衡時，佢就話：「我啲仔女最細嗰個20歲，分別係20歲、22歲同25歲，咁佢哋咪大晒，咁我做咩呀，唔通喺屋企等老公返嚟食飯呀？梗係做吓自己啲嘢喇，呢啲就係我嘅時間，所以我就決定咗返嚟香港，因為我好掛住香港，同埋有個機會啲仔女可以唔使理，我辛苦做媽咪廿幾年，女人應該繼續充實自己，而家就可以當作嘅第二事業。」同時佢表示冇諗過會教書：「我做咁多年清談節目，幕前幕後都做過，所以不如而家同啲學生交流。」

被問到同學係唔係都知道佢係明星時，佢就否認並話：「我就播咗我第一套戲《飛龍猛將》演出嘅片段，跟住我就問你哋知唔知呢個女仔係邊個呀，冇人答到，完全冇諗到係我，後尾另一個老師朋友話呢個係你哋嘅郭教授，佢哋就「吓」及即刻攞晒電話出嚟影，因為幾難得嘅，我冇諗過擺我幕前嘅歷史喺佢哋課室入面㗎嘛」。之後被問之前點樣將家庭及工作平衡時，佢就話把握時間，只有一有機會就去做，例如而家佢就諗緊返嚟拍攝短片，做多啲電影相關嘅工作。

俾人感覺開心嘅郭錦恩，被問到早年有冇經歷過挫折時，佢就話：「曾經我嘅大仔喺10幾歲嗰時，令到作為家長嘅我有啲非常困難嘅挑戰，嗰陣時咁低落，我都會搵瑜伽或者會做好多嘢，一定要正面嘅角度去睇人生，我覺得一定有好嘅方法去處理某啲嘢。」

howardwo

淡出娛樂圈