李日朗憶生日翌日遇嫲嫲離世想請假但無情高層竟話：你阿嫲死唔係你死

GIRLAV · 發表於 2025-8-11 19:23:59

現年43歲嘅李日朗（Don），喺2003年以歌手身份出道，並因拍攝TVB青春偶像劇《當四葉草碰上劍尖時》令人關注，及後與蔣雅文（Mandy）以情侶檔形式發展，不過發展平平。2010年與唱片公司完約後，選擇北上內地發展。近年佢淡出娛樂圈，任職國際塑顏術教師，擁有自己嘅店舖，親自為顧客進行小顏術之外，亦有收徒弟。早前佢拍片正式宣布退出娛樂圈，依然活躍於社交平台嘅佢，不時拍片與網民互動。

最近李日朗又有新片啦！佢喺片中表示二十幾歲時生日翌日遇上嫲嫲離世，非常傷心嘅佢想向公司請一日假，點知當時公司嘅高層竟然話：「阿朗，你阿嫲過咗身，不過唔係你呀嘛，你阿嫲死唔係你死，你而家仲有一個鐘頭時間，你好返公司，如果唔係你以後都唔使撈」，所以佢當日都有返公司。

之後李日朗再話：「嗰件事令我明白，我係呢個社會上喺一件無價值嘅貨，如果我唔想再咁樣俾人對待，就需要努力，成為一件唔能夠被取代，或者有價值嘅貨。直到今時今日我喺咩行業都好，我會堅持努力，因為我會想成為一件如果冇咗我會覺得可惜嘅商品。」並喺最後寫上：「我沒有耿耿於懷，不過一些教訓確實影響了我的人生。」

影片出街後，唔少身同感受嘅網民紛紛留言，例如「每個人都有價值。只係你入咗一間冇人性的公司。成長都係過程。你會想返，你會點做？加油。李日朗先生。」、「遇到那些領導，我想辭職。因為我的家人很重要」、「這種無人性的高層，幹下去也沒前途」、「什麼公司啊，應該倒閉了吧」、「你永遠不是商品」、「將心比心，這樣的領導不配做人，連一絲人性都無」、「我能理解你啲......人生其實很無奈」及「公司也太冷血了，一點情面都不留」等等。