錢嘉樂坦言湯盈盈徹底改變自己 大爆老婆馭夫秘訣

GIRLAV

錢嘉樂與湯盈盈因拍攝TVB綜藝節目《超級無敵獎門人》擦出愛火花，低調相戀5年後公開戀情，2012年喺海洋公園大熊貓園內熊貓「盈盈」和「樂樂」見證下簽紙結婚，育有大女錢凱晴（Alyssa）和細女錢凱琪（Kassidy）。日前錢嘉樂接受鄭丹瑞YouTube頻道《健康旦 HiEggo》訪問，大方分享家庭點滴，不諱言係太太湯盈盈徹底改變咗自己。

錢嘉樂曾與李麗珍、關秀媚等女星交往，最為人津津樂道嘅就係與李珊珊長達8年嘅戀情。錢嘉樂與李珊珊因合作TVB劇集《烈火雄心》而拍拖，曾多次喺朋友起鬨下向李珊珊求婚，但最後「婚」訊變「分」訊，二人喺2006年分手。李珊珊此前接受訪問時直言，當時錢嘉樂係喺壓力下「跪低」求婚，呢段感情並冇傾過未來，更淡然表示：「個天安排，要完就完。」錢嘉樂與鄭丹瑞分享，最初對湯盈盈印象並不深，只知道佢係從外國回流嘅女生，被問及為何會愛上湯盈盈，錢嘉樂第一時間表示係緣份，指深入了解後，發現湯盈盈非常孝順，與父母感情緊密，每日打長途電話問候喺加拿大嘅父母，令佢感受好深：「佢都叫我要搵多啲爸爸媽媽，我唔係唔錫佢哋，不過男仔同女仔嘅態度唔同，我唔會日日打電話畀佢哋噓寒問暖，但原來有啲嘢要講出嚟，唔講人哋又點會知，所以我會更珍惜同屋企人來往。」

除咗細心體貼，湯盈盈更擅長入廚，成就了「鎖住男人嘅心就要先鎖住他個胃」嘅傳說。錢嘉樂笑言唔知係咪湯盈盈阿媽教佢：「佢會煮飯煲湯，佢喺外國返嚟以為係ABC，點知識煮飯煲湯又會噓寒問暖，會影響埋身邊嘅另一半。」呢種內外兼備細膩嘅照顧，令錢嘉樂覺得呢個女仔幾好；湯盈盈嘅出現不僅收復浪子，亦徹底令錢嘉樂嘅性格產生轉變。婚後，成為愛妻號及暖男爸爸，生活重心放喺家人身上。錢嘉樂坦言，對兩位女兒嘅未來唔會有太多限制，唔會強求佢哋繼承演藝或功夫家業，都唔會干涉佢哋嘅人生選擇，只希望兩姊妹可以按照興趣盡情發展。佢更感性地對父母表達感恩：「我阿媽當年都係咁樣做，我成日同老竇講話多謝你，雖然你冇李嘉誠畀咁多錢我，你畀咗我非常好嘅身體，等我喺洪家班可以捱得到，你嘅腦想捱但身體捱唔到都要棄權。」

howardwo

家庭幸福