羅浩楷神隱4年再現身 透露有呢個心願 講起炒股依然興奮︰等大家執多少

GIRLAV

八九十年代TVB扮嘢能手羅浩楷，2015年因健康出問題淡出幕前就一直神隱，到2021年先接受好友鄧英敏嘅網上節目訪問，楷楷因病影響身體姿勢，唔少觀眾都感到可惜。最近有網民喺facebook群組提起羅浩楷，網民都盛讚楷楷演喜劇有一手，引起熱烈討論。有傳媒搵羅浩楷接受電話訪問，訪問中楷楷承認自己有柏金遜症，近年情況轉差，手腳活動能力唔多好，現時要以輪椅代步。抱恙多時，羅浩楷直言「有病唔醫架啦」、「我都唔知幾想死」。

訪問引起唔少迴響，網民都希望羅浩楷好好保重，而鄧英敏早前就再搵楷楷接受獨家訪問。幾年冇見嘅羅浩楷依然好好中氣，睇落亦好精神，只係頸椎舊患令佢依然只能彎身而坐。已經有6部「戰車」嘅羅浩楷，今次訪問同鄧英敏去咗揀電動輪椅，期間透露有個心願，就係想開個人音樂會。楷楷就話想搞過招待五六十人、觀眾坐住輪椅聽嘅音樂會。羅浩楷不忘發揮搞笑本色，話希望喺演唱會上唱《李香蘭》，「我大佬係玉置浩二（《李香蘭》原版主唱），我叫玉置浩楷」，然後眼仔碌碌望鏡頭。

鄧英敏訪問中同羅浩楷講，唔少圈中好友都想為羅浩楷介紹醫生，但熱愛研究股票嘅羅浩楷就話：「我覺得最好係睇吓有邊隻股票近排好有前途，我就會介紹畀你去黄大仙扶乩，睇吓得唔得。得嘅話就會介紹畀啲觀眾，等大家執多少嚟飲吓茶」。一輪妙語連珠後，羅浩楷亦開始見疲態，同鄧英敏講「我好攰啦」，敏哥亦都立即打圓場。

funnytey

祝福他早日康復