李珊珊暗示舊愛錢嘉樂「被迫求婚」 拍拖8年冇講過未來

GIRLAV

一度因情緒病神隱多時嘅李珊珊近期積極重返幕前，除咗喺youtube channel做訪問節目，早前亦都為陳志雲嘅網上節目擔任嘉賓，大談入行經過之外，仲講咗唔少感情事。

李珊珊喺節目中承認18歲起不停拍拖，直到最近3年先至單身。陳志雲提到珊珊其中一段維持8年嘅關係，而咁啱當年珊珊拍《烈火雄心》同錢嘉樂撻著，交往8年後和平分手。

志雲大師問李珊珊「當年對方多次求婚，點解都唔應承？係咪對婚姻有恐懼？」，珊珊立即否認，並澄清指「首先要搞清楚一樣嘢，係大家覺得好長（拍拖時間）……呢個話要包10圍（婚宴酒席），另一個又話要包10圍，『跪啦！』求婚咁樣。對方係被迫嘅情況下跪低去做呢件事，根本就唔係報紙所講……」。陳志雲追問「（男方）唔係真係去求（婚）？」珊珊話「唔係架」。

陳志雲問李珊珊「如果（對方）真係去求你會唔會應承？」，李珊珊坦言唔會答應。「我哋從來都冇計劃，一開始從來都冇講過未來，係真係冇未來……我覺得係個天安排，要完嘅就完啦」。李珊珊指當年蘇民峰有講「嗰一年唔結（婚）就分（手）」，結果真係講中。