袁潔瑩拍《開心鬼》未成年收工去蒲被黃百鳴捉返屋企 流淚感謝恩師「因為有你先至有我」

GIRLAV

八十年代以「開心少女組」出道嘅袁潔瑩Fennie，近年少有作品推出，但就不時喺社交平台上載片段分享近況。早前由黃百鳴開設嘅youtube channel就搵咗袁潔瑩做嘉賓，重溫當年百鳴哥搵佢入行嘅經歷。

袁潔瑩之前都提過，15歲時喺中環街頭同男友鬧交時被睇中邀請拍《開心鬼放暑假》，而當時擔任監製及男主角嘅黃百鳴就以另一角度講返點樣發掘到Fennie。黃百鳴話講到當初為戲中「卑鄙會會長」一角選角而懊惱，於是同《開》導演高志森去蘭桂坊碰運氣發掘新人，最後都係無著落。後來準備離開之際，二人喺中環鏞記酒家門外見到有對小情侶嗌交。黃百鳴覺得個女仔惡得嚟幾可愛，於是叫高志森落車邀請。袁潔瑩憶述當時嗌緊交，對於有架跑車停喺度，只係覺得「人哋鬧交關你咩事呢，咁八㗎你哋？」。後來黃百鳴都落車自我介紹同叫袁潔瑩去試鏡，Fennie第二日放學就去赴約。

拍攝時袁潔瑩仍未成年，黃百鳴都會睇住一班小妹妹，袁形容百鳴哥「係嚴謹唔係嚴厲」，甚至試過喺片場被搜書包。「副導演收到風，班𡃁妹有人食煙，逐個逐個摷書包。佢（副導）話『你真係唔好彩，俾我第一個摷先……『冇嘢嘅？』，我話咁即係唔係我囉。」黃百鳴話佢喺拍攝現場訂下三大規則，就係唔准食煙飲酒、講粗口同賭錢，又形容「片場好澩嫪，粗口滿天飛，呢樣嘢我係好唔鍾意，總言之我喺現場拍嘢，我唔容許呢件事發生。」袁潔瑩指佢嘅父母多年來只有喺佢拍《開心鬼放暑假》時探班，證明家長都好放心。

片場以外，收工後黃百鳴同樣睇實袁潔瑩，甚至由夜場捉佢返屋企。袁潔瑩憶述「當時後生，覺得瞓少幾個鐘唔係啲乜嘢，我當時就同大傻哥（成奎安）同埋新藝城宣傳部幾個女仔去玩。跟住突然間有人收到風，好遠距離已經話『黃生嚟緊喇！』，其實仲有一兩個演員喺度，但係你淨係執我走」，結果黃百鳴搵司機車佢走。黃百鳴就話，咁做係因為袁潔瑩未成年，第二朝又要開工，驚佢唔知玩到幾點，不過百鳴哥話而家睇返咁做就覺得有啲過份。

袁潔瑩因為《開心鬼放暑假》一炮而紅，但亦都帶來成名煩惱。Fennie話拍完戲返返學之後，學校唔少高低年級同學都趁午飯時間走去佢嘅課室外面「一睹明星風采」。校方最後婉轉要求袁潔瑩主動退學，並且向佢話『其實咁樣對你都唔係好公平，不過如果影響到學校同同學啲情緒就唔係幾好。』

訪問中，袁潔瑩自爆當年片酬有1萬5千蚊，後來電影收得，幾位少女主角有得分多5千蚊，以當年計相當可觀，Fennie亦都話未遇其他製作人咁做。而喺訪問尾聲，袁潔瑩都忍唔住要擁抱黃百鳴，直言「因為有你先至有我」。

至於當年同袁潔瑩鬧交「造就入行」嘅男友，Fennie話已經失去聯絡，亦都想搵返對方。黃百鳴自責當年落車叫袁潔瑩拍戲好似拆散鴛鴦，袁就笑謂對方要去外國，去到尾都係會分手。

howardwo

陳年往事