|
|
75歲嘅殿堂級填詞人黎彼得，近日在YouTube主持節目《玖噏秘笈》，不時大爆娛圈秘聞。Peter哥曾經喺節目中直指四大天王同陳奕迅之後「跟住都冇人」，更加焫埋唱功同人氣一樣屬於頂級嘅張敬軒，直指「咩軒仔呀？都唔知邊個嚟嘅」，仲喪插近男團MIRROR「嗰啲都唔係歌星嚟嘅，十零條𡃁仔出嚟跳來跳去，咁又話賣成幾千蚊張飛，唉……根本係唔健康嘅嘢」。
搶口言論背後，黎彼得並唔係過得咁招積。早前黎彼得接受傳媒專訪，自爆3月中因流感而入院，留醫期間發現貧血、糖尿病、腎功能問題等，一度要入ICU，結果出院時瘦足十幾磅。身體抱恙但慶幸人間有情，同黎彼得一齊拍過《愛．回家之開心速遞》嘅鍾志光，不時約Peter哥飲茶問候。就連向來關係麻麻嘅兒子，都有拎食物俾黎彼得，又陪伴攞藥。
黎彼得同前妻育有一子，但喺阿仔3歲時前妻決定離開，之後Peter哥一個人帶住個仔。由於要搵錢獨力撫養兒子，Peter哥工作繁忙，唔少時間都係由菲傭照顧個仔，父子關係麻麻，平時鮮有溝通。早幾年黎彼得透露兒子喺內地攻讀中醫課程，但今次專訪中Peter哥指兒子讀咗4年結果未能畢業，佢相信阿仔可能係冇人睇住於是成日走堂。37歲嘅兒子而家索性躺平，喺屋企打機度日，父子平日冇偈傾，但黎彼得會為兒子找卡數，早排先至清咗十幾萬。一直為未能陪兒子成長而內疚嘅黎彼得，早幾年表明希望財政上照顧好個仔先至百年歸老。至於會否希望阿仔自食其力，Peter哥直言唔理得咁多，亦唔否認太疼錫個仔，因為得一個仔冇得揀。而今次黎彼得對記者表示，唔擔心阿仔不能自理，「唔會死嘅」。
黎彼得3年前因為入院做「通波仔」手術後被TVB飛出《愛．回家之開心速遞》。手停口停之下，富商劉鑾雄主動資助Peter哥手術費及生活費，加上契仔黃宗澤（Bosco）等人亦出手幫忙，協助佢度過難關。黎彼得今次再確認大劉已經停止資助佢嘅生活，至於契仔黃宗澤Peter哥就話唔想騷擾人，於是冇聯絡。雖然已經75歲，但係黎彼得仍然希望搵個伴，甚至公開徵婚，因為眼見朋友李龍基都得，佢相信自己都有機會。 |
|
在線雷達
發表於 2025-7-21 18:29:01
廣播
置頂
推舊帖
收嗲鳥
油顏色
