吳家樂鄧兆尊談「萬歲的藝術」兆尊試過請飲茶用咗一個月人工 燕窩被人偷龍轉鳳

GIRLAV

早前TVB藝人董敬文喺社交平台分享，早前播畢嘅《刑偵12》有咩拍攝趣事，敬文大爆參演劇集嘅女藝員林熹瞳喺酷熱天氣下好心「萬歲」請飲嘢，但就叫咗熱飲，令工作人員根本唔想飲。

由吳家樂、鄧兆尊同謝遜主持嘅《娛樂好好玩》談及此事時，並分享喺拍攝現場「萬歲」原來要好有技巧，時機、原因同輩份都要考慮，唔係拎錢出嚟就得。吳家樂話「你萬歲其實要醒目架……你要諗究竟咩時間萬歲，食飯時間萬歲、下午茶時間萬歲定轉景時間萬歲？今日有冇大佬嚟萬歲？如果大佬喺度未出聲，你萬歲咗？」。兆尊插一句話「大鑊啦……你今次萬歲咗3千，下次要萬歲幾多先得呀？咁咪變眾矢之的」。

被傳身家豐厚嘅鄧兆尊當然試過萬歲，仲分享2單經歷。兆尊話試過請大家食外賣糖水，送到後有人俾咗碗燕窩甜品佢，兆尊將呢碗燕窩放喺櫃桶，點知轉頭想食嘅時候發現被人換成西米露。另外有一次，兆尊話當日早上要拍好多場戲，於是同幕後講「可唔可以拍快少少，我地唔駛食飯盒，可以去飲茶」，拍攝隊伍於是好爽手完工，比平時快一個鐘。去到茶樓飲茶食晏，但因為太攰，兆尊夾咗粒燒賣食，未吞就瞓著咗，醒返發覺自己仲含住粒燒賣。而嗰餐茶因為喺沙田一間海鮮舫度食，埋單要三千幾蚊，連兆尊都話好甘，「我一個月人工都係三千幾咋」。

howardwo

坐埋吹下水！