中年好聲音4｜張佳添前妻點名海兒冇得留底因年輕養眼成評審阻礙？

GIRLAV · 發表於 2025-7-8 15:23:53

「音樂女神」女高音海兒（Hedy）因擔任《中年好聲音3》評審而為人熟悉，10歲開始學聲樂，畢業於英國倫敦皇家音樂學院碩士畢業，去年加盟英皇娛樂，表示任何類型嘅工作都想嘗試，而佢日前就完成音樂劇《三•八》。《中年好聲音4》現正舉行北美地區海選招募，但近日傳出《中年好聲音4》嘅評審將會有所不同，唔少樂迷都極關注邊個評審會繼續留任。張佳添前妻和資深填詞人黃敬佩日前就點名指最大機會冇得留底嘅係海兒。

黃敬佩於YouTube個人頻道分享對《中年好聲音》評審陣容嘅睇法，指每個評審都各有人設，例如肥媽走溫情路線，比較人性角度去處理、張佳添專注歌唱技巧、周國豐以資深DJ視角評分，至於被指因搶洪心怡遭TVB炒魷嘅伍仲衡則較幽默及要求高。對於海兒，黃敬佩認為佢係年輕養眼，但就與其他評審感覺唔係好夾，覺得海兒最有機會冇得留任《中年好聲音4》評審：「點解整個咁後生嘅海兒老師，揀選我相信有原因嘅，首先養眼先，佢IG follower都唔少，好sexy，又唱到歌又sexy，但係老老實實就係有少少好似唔係咁……比起伍仲衡同其他評審，夾嘅程度有啲唔一樣，因為佢零零舍舍後生，同埋因為佢係古典，classical。」

28歲海兒係《中年好聲音》系列最年輕評審，黃敬佩表示正正因為海兒嘅年紀與節目格格不入，指參賽者多選以8、90年代經典粵語流行曲或英文歌參賽，海兒對呢類歌未必熟悉：「海兒唱開古典音樂，同流行歌好唔同，佢係咪真係適合長期做呢個節目評審呢？而海兒未夠30歲，可能好多參賽者揀選嘅歌，佢都未必咁熟悉，佢太後生可能同歌曲冇共鳴感。對以前嘅歌熟悉係好重要，如果一個評審，係熟悉嗰個時代，可以講到當年嘅感受，係會更有說服力。」另外，黃敬佩估計海兒未來有機會推出新歌，未能應付到《中年好聲音4》長時間嘅拍攝行程。