|
|
綠葉演員張國強（KK）演藝經驗豐富，原先為甲組球員嘅佢當年與隊員一齊去應徵TVB電視劇《無花果》角色，結果無端端入咗行，曾拍電影、劇集及擔任兒童節目主持，多年來參演過無數劇集，角色性格背景多變，無論係忠角或奸角都能將角色拿捏得入木三分。早前，張國強於劇集《奪命提示》飾演反派「關Sir」，被激讚演得及「教科書級奸笑」；張國強又有份出演昨日開播嘅TVB劇集《執法者們》，於劇內飾演警務處副處長，不過被問到角色係忠定奸，佢就極神秘咁話：「意想不到。」
張國強近年將工作重心轉向內地，除咗參與商演活動，仲入駐小紅書分享工作與生活，希望藉此畀大家見到佢唔同嘅一面；日前，張國強出席《執法者們》宣傳活動，坦認現時以自由身接洽工作，表示比過往自由度更大：「其實以往一直都有很多內地的工作邀請，但因為TVB拍攝密集，的確是較難請假，現在自由度大了很多，所以到內地發展的空間也大了。 」
張國強坦言與TVB並非不歡而散，表示TVB當時有搵佢洽談挽留：「有，當然有啦！我唔係畀人…哈哈，我係好多機會㗎！」續指，與TVB結束合約原因不外乎想嘗試更多事物， TVB需要的話都會返去拍攝，就好似今次《執法者們》咁：「TVB要我拍嘅，我都返嚟喇，香港嘅製作我又會返嚟，唔係話一定要喺邊度拍嘅。作為演員，全世界都可以去演出，有機會去荷里活我都會嘗試。」 被問到係咪TVB薪酬打動唔到佢續約，張國強則再表示從報章上得知魯振順約滿不獲TVB續約心淡離巢，直言每個人嘅想法同經歷都唔同：「有時此地不留人，自有留人處。覺得呢個空間唔得，可能另外一個空間得呢。」 對於唔少演員直播帶貨，張國強表示每個人都有自己嘅意願和路向，佢自己嘅普通話唔叻，又會擔心帶貨直播：「帶貨直播更加驚，都有好多人搵我做，但出咩價錢我都覺得無謂，我覺得自己唔係呢方面嘅人才，正如我唔係演笑片嘅人，你夾硬要我演都係好大一個難度，所以我覺得冇必要接受呢種挑戰。」張國強分享指自己仍鍾意專注喺戲劇方面。
|
|
在線雷達
發表於 
廣播
置頂
推舊帖
收嗲鳥
油顏色
