女神配對計劃︳葉蒨文保住曾展望另一對象林澤謙拍過內褲廣告被爆疑曾因官非入獄？

GIRLAV · 發表於 7 天前

TVB戀愛綜藝《女神配對計劃》尋晚播出第3集，2位女神葉蒨文同關嘉敏會同海選中挑選嘅3位追求者，喺三角形餐桌共晉晚餐。而喺晚餐前，女神們要先寫低一個保護名額誰屬，另外2人就由花生團決定邊個會被淘汰。

喺第一集引來廣泛討論嘅葉蒨文Sophie同追求者曾展望GM，今集展開三角約會時GM未有優勢，甚至不時喺Sophie同其他追求者傾偈期間插咀令印象分插水，更加只能睇住Sophie同運動員出身嘅林澤謙Him食甜品。葉蒨文都係圈中人，曾展望被Sophie問到接唔接受到女友拍親熱戲，GM表明「唔OK……不過要氹返我」，好cute。GM喺節目中向葉蒨文剖白話自己唔識得拍拖，「我覺得我都幾緊張女朋友…我驚我自己好鍾意一個人，點解好似成日扮到咁瀟灑呢？其實有陣時好驚自己好鍾意之後會好Hurt，所以一有啲鍾意喇，就同自己講，唔好咁鍾意，因為我覺得每次自己好認真嘅時候，好似都會出事，所以其實我平時都好少可會想公開追女仔，但我見到你之後真係有個念頭，想試吓照顧你」，睇到花生團成員之一嘅江美儀都話「冧爆」。雖然曾展望唔係全程表現出色，不過節目尾聲時葉蒨文自揭要保住邊位追求者時，都係揀咗GM。

至於另一位追求者林澤謙Him，因為唔少睇法同Sophie接近，因此被稱為「男版葉蒨文」，甚至被視為GM嘅主要勁敵。但係有報導指，一名名為林澤謙嘅男子，涉及2016年立法會選舉資訊科技界種票案而被判入獄。翻查當年資料，事發時年約18、19歲嘅林姓被告，受朋友拉攏加入一個組織，藉以登記獲取資訊科技界投票資格。案件於2021年裁決，24歲嘅林澤謙被判罪成，需要入獄6周。

今年28歲嘅林澤謙畢業於中大，係港隊男子手球運動員，曾經喺去年為ViuTV嘅奧運手球環節擔任旁述。林澤謙擁有運動員身型，不時喺IG出post晒肌，仲post過自己為內褲品牌拍攝嘅半裸廣告。