18歲姚焯菲狀態弗爆亮相活動網民激讚愈大愈靚：有鍾欣潼嘅影子

GIRLAV · 發表於 2025-6-19 18:12:25

姚焯菲（Chantel）當年以14歲之齡參加TVB歌唱選秀節目，勇奪亞軍後備受TVB力捧，雖然期間要到紐西蘭升學而放慢歌唱事業，但仍無阻「小菲象」對佢嘅支持。近月畢業回港嘅Chantel搞作多多，加入處境劇《愛•回家之開心速遞》劇組以外，也推出新歌、仲出演音樂劇《三•八》及準備與鍾柔美（Yumi）及詹天文（Windy）衝出香港，於7月喺廣州舉行「Time To CYA」演唱會。時至今日已18歲大個女嘅Chantel近日出席品牌活動，被網民野生捕獲，其無濾鏡生圖被分享至社交平台，唔少網民激讚Chantel愈大愈靚。

Chantel遇到粉絲都會親切合照，去年有網民PO出於紐西蘭巧遇Chantel嘅照片，就被網民指佢發福，驚現pizza面與水桶腰，直言完全認唔到係Chantel。不過之後Chantel分享嘅照片就見到佢又瘦返。日前Chantel以貼身T-Shirt出席品牌活動，無論係樣貌定身形都狀態十足，網民分享Chantel當日活動嘅照片引發熱烈討論，唔少網民都大讚Chantel夠晒青春又靚女：「靚咗喎」、「咁快咁大個女」、「菲菲青春靚女」、「愈大愈靚女」、「鄰家女孩初長成」等等，仲有網民話覺得Chantel有鍾欣潼（阿嬌）嘅影子。