麥美恩緋聞男友許文軒自揭與陳偉霆22年老友關係 深耕主持工作多年無忘初心？

GIRLAV

許文軒主力於TVB擔任主持工作，唔少大騷都有份主持，近年除咗兼任《中年好聲音》主持之一，更加主持節目《Music Break》、《StarTalk》、《勁歌金榜》等節目。日前許文軒於社交平台分享偶遇陳偉霆嘅合照，自揭二人已相識22年。

許文軒分享一張陳偉霆搭住佢肩膀嘅合照，透露食飯時竟巧遇識咗22年嘅老朋友陳偉霆，寫道：「真係約都冇咁啱！冇諗過食食吓飯，有一個好耐冇見，但識咗22年嘅老朋友突然坐咗落嚟，嗰吓完全反應唔嚟，仲嚇咗一嘢！咁多年，原來大家都冇乜點變！」又表示應該冇乜人知道佢同陳偉霆識咗好耐：「其實我哋係參加同一屆新秀，當年佢代表香港，我就代表悉尼！就係咁就過咗22年，好好珍惜相遇嘅時刻！」

原來許文軒於2003年參加全球華人新秀歌唱大賽（雪梨區選拔賽），獲得冠軍及最佳台風獎；同年回港參加總決賽，同屆參賽者就係陳偉霆，而陳偉霆就囊括香港區冠軍，以及勁舞台風演繹獎同自我才華表現獎。唔少網民都表示估唔到二人關係：「擁有這樣的友誼，真的棒極了！」、「好好珍惜這段友誼」、「又真係估你唔到」、「Wow兩個都咁靚仔」等等；又有網民留言詢問許文軒幾時可以聽到佢唱歌。

雖然許文軒多年來深耕主持工作，但與音樂有密切關係，包括ENews嘅《StarTalk》環節，以及2020年嘅《我們的音樂時代》，由構思、搵嘉賓、聯絡到後期製作及剪接，許文軒都親自參與，過程足足超過一年。2022年，《中年好聲音》第一輯接受報名參賽，當時許文軒就直言一直都冇放棄過唱歌嘅夢想，本身諗住可以參加《中年好聲音》，但後來先知係畀素人參加，覺得有啲可惜。

howardwo

原來係咁嘅！