甜筒無筒咩玩法？維記新款甜筒拆出隱藏版 網民：宣傳手法？

GIRLAV

最近有多款雪糕雪條在便利店上架引來熱烈討論，除了斷貨的香蕉雪條和哈利波特甜筒之外，被瘋搶的應該就是這款維記士多啤梨乳酪甜筒，原因不是造型或味道，而是竟然甜筒都有盲盒式隱藏版玩法，隨時結揭出無筒的甜筒！

甜筒無筒意外成隱藏版
社交平台這兩天都有網友發文表示買甜筒竟然揭出無筒隱藏版本，對此迷惑又驚訝：「維記新出牛奶士多啤梨脆脆甜筒真係好好食，不過我個甜筒冇咗個筒，所以好快溶不過真係好好食！算唔算係贏咗99.9%香港人？」帖文一出，引來網友熱烈討論：「點解會無左個筒SSR版？」、「錯版甜筒有冇得放上網炒？」原來「甜筒無筒」不是個別事件，有人說：「一個朝早碌已經三個po話呢個雪糕無筒。」更幽默回應：「最多贏50%香港人。」。

幸運或不幸 隱藏版「好難食」
有帖文表示：「搵唔到banana雪條，將所有lucky，變咗做一個冇cone嘅甜筒，btw 好難食，鮮牛奶士多啤梨甜筒。」未知帖主的「好難食」意思是指無筒進食難度高，還是味道差，有網友表示：「冇筒真係食唔切喎！」、「好味啊！要限時內食完。」不過原來拆到隱藏版似乎大有人在，有網友回應：「係咪要召集甜筒錯版圖鑑？」、「係咪marketing嘅手法？因為我打算買10支返嚟當盲盒咁樣拆？」甜筒無筒竟然變成隱藏版玩法，可能品牌方都始料未及，究竟是批次問題，還是宣傳手法？