88歲「順嫂」梁葆貞爆梁朝偉拍劇遲到 大讚張國榮乖仔卻未能兌現約定

GIRLAV

88歲梁葆貞出身自演藝世家，為著名粵劇及電影演員梁醒波女兒，兩名姊妹文蘭及梁寶珠皆為演員。梁葆貞過往因拍攝長壽處境喜劇《香港81》至《香港86》「順嫂」一角演活草根師奶本色而深入民心，又曾參演情境喜劇《餐餐有宋家》及長壽劇《真情》。不過梁葆貞已退休近10年，隨女兒移民加拿大享清福，偶爾返港與老朋友聚舊。早前梁葆貞接受香港演藝人協會《傳承．前輩專訪》訪問，大談當年工作辛酸；其中又提到多位後輩對老人家相當尊重，包括梁朝偉、張國榮。

梁葆貞表示當年因為無存貨嘅關係，拍攝非常緊張，由早上9時回到TVB，拍攝到下午5時，剪接後晚上8時播出：「每日都係咁，我哋回到去個劇本仲係暖嘅，啱啱印出嚟，我哋硬將對白塞入腦，無預先拎劇本呢樣嘢」；又提到自己當年住喺錦繡花園，早上接6時通告返工路程特別困難：「06通告唔死啊？」梁葆貞憶起當年與梁朝偉拍攝劇集《俠客行》期間，對方問佢翌日通告時間：「嗰日偉仔車我返屋企，佢問：『你聽日幾點通告呀？』，6時囉，佢話『唔好咁早返』，我問點解啊？」梁葆貞表示當時梁朝偉解釋指二人翌日將同場拍攝，但自己會返8點，所以叫梁葆貞預返到咁上下時間先返。不過，梁葆貞指當時大家地位唔同，擔心梁朝偉如果失眠早返到公司，自己遲到會被責罵，最後僅遲到半小時，於6點半到達公司。梁葆貞憶述當年梁朝偉返到公司後微微笑咁問佢幾點返到，對方指：「話咗你又唔聽」，梁葆貞則與梁朝偉表示：「我話驚你阿哥失眠，你返咗我未返，我會死㗎」。

此外梁葆貞提到好多後輩都好友善，例如「哥哥」張國榮，表示二人無真正合作過，但張國榮經常於電視台工作，撞口撞面；對方僅客串過一集，於劇內飾演租客，因而接觸多咗。梁葆貞表示當張國榮得知佢去咗溫哥華，講咗句：「返溫哥華唔搵我！」，梁葆貞當時向其解釋指：「我話大哥我冇你電話、冇你地址去邊度搵你啊！佢話：『我𠵱家寫畀你』，跟住（有人）叫張國榮入廠，佢真係拍完個鏡頭，寫住個電話去廠搵我，佢唔知我喺邊間廠。」梁葆貞大讚張國榮好乖仔，寫完電話畀佢仲叫佢一定要聯絡，到時帶佢去飲茶及參觀屋企。梁葆貞指：「佢（張國榮）走咗了，畀咗個地址我就去咗，我始終無見過佢。」梁葆貞感慨表示：「即係愈紅嗰啲就愈好。」

howardwo

陳年往事