譚玉瑛罕談愛情事與初戀男友「師生戀」拍拖40年 坦言無意結婚：分開仲要搞手續實在太悲劇

GIRLAV

譚玉瑛1979年透過TVB藝員訓練班入行，及後由1982年開始主持兒童節目《430穿梭機》、《閃電傳真機》、《至NET小人類》、《放學ICU》，絕對係幾代人嘅集體回憶。直至2014年譚玉瑛不被續約，喜愛食嘢同飲酒嘅佢近年樂於轉做飲食節目主持，先後主持《阿爺廚房》系列和《香港原味道》系列。譚玉瑛多年來甚少談及自己嘅私生活，只知佢係圈中小富婆，並與男友周震聲相愛近40年；曾有傳二人於21年前已秘婚，但譚玉瑛否認瞞婚，並澄清自己一直未結婚。早前，譚玉瑛接受方健儀YouTube頻道《女人方言》訪問，激罕提及愛情事。

周震聲原為譚玉瑛中三時嘅數學代課老師，及後又成為譚玉瑛嘅補習老師，之後開始拍拖，為譚玉瑛初戀男友。譚玉瑛於方健儀YouTube頻道《女人方言》坦言自己係個實際嘅人，被問到對結婚睇法，佢回答指：「可能見慣好多人離婚，我身邊好多人離婚，我覺得兩個人喺埋一齊好開心，但如果唔喺埋一齊就分開，如果分開嘅時間，仲要搞咁多手續，成件事實在太悲劇。」譚玉瑛續指，好多人結婚都係為咗有下一代，但佢就覺得其實做人唔係咁開心，笑言：「唔好搞咁多人出嚟，我點解成日話想努力啲，提升自己做人開心啲，因為做人實在唔係咁開心，所以必須努力，你先可以開開心心過日子，唔好戇吓戇吓咁過」。

譚玉瑛憶起當日做「姐姐」與同事講再見嘅場面，指當時好想快啲回家，因為有好多記者跟住；方健儀詢問譚玉瑛，指除咗避開記者，會唔會係因為屋企有個人等你，覺得屋企係庇護之所。譚玉瑛回應指：「都會，同埋我好鍾意喺自己屋企」，對於未來生活，佢就表示好鍾意做電台嘅生活：「日日都返工，由星期一至五都要出去做嘢兩個鍾，因為我住得遠，變咗每一日冇咗好多個鐘，反而依家喺生活中我會編排生活，睇下可以點先可以食到自己鍾意食嘅嘢，維持自己鍾意嘅生活模式。」

howardwo

陳年戀事