蘇永康為兒子學校活動演唱《男人不該讓女人流淚》網民熱議「真係啱數咩」

GIRLAV · 發表於 2024-12-11 14:40:41

唔少娛圈星級父母嘅子女都係就讀名校聖士提反書院附屬小學，往年學校活動上，都有歌手家長上台獻唱。

蘇永康同太太Anita嘅寶貝仔Jazz（蘇展弘）今年7歲，Jazz亦係聖士提反書院附屬小學學生。有網民拍片分享，今年蘇永康為該校開放日做表演嘉賓，唱功了得嘅「阿公」當然上台演唱，但係佢揀嘅曲目係《男人不該讓女人流淚》……唔少網民都討論喺校園唱呢首歌係咪合適，亦有人認為冇問題，因為係叫一眾爸爸「男人不該讓女人流淚」喎。

過去聖士提反書院附屬小學開放日有鄭中基上台獻唱，因為Ronald囡囡Emma都係呢間學校學生，而鄭中基當時選唱嘅係大熱歌《無賴》，同樣成為網民討論話題。另一實力歌手關心妍嘅女兒Jovia都係讀聖士提反書院附小，難怪學校被稱為「全香港最容易追星的學校」。

位於赤柱嘅聖士提反書院附屬小學，係全港唯一寄宿小學，學生需要喺六年級在校寄宿一年，務求培養獨立能力，並為學生升中或海外留學前作準備。學校每年招收約100名小一學生，平均20人爭一個學位，而該校2024年全年學費為92,500元。