黑色月光｜蔡誌恩跳出框框演奸角 網民讚眼前一亮：奸在骨子裡

GIRLAV

由楊茜堯（前名楊怡）、王浩信、林夏薇、馬志威、黃翠如及楊卓娜等演員演出嘅TVB台慶劇《黑色月光》正熱播，劇情亦進入白熱化階段。除咗報仇劇情引起熱話之外，劇中演員表現同樣獲關注。蔡誌恩（Vincent）係劇中飾演「三重無間道」Kenny（霍建堃），係一個充滿野心嘅人，先後周旋喺「卓昊天」郭鋒、「SK」張頴康及「卓慧雲」林夏薇之間，今次蔡誌恩跳出框框飾演奸角，角色同以往好唔同，令觀眾眼前一亮。

蔡誌恩曾任唔同種類嘅職業，背景可以話係超猛料。佢畢業於香港城市大學會計系，曾任香港有線新聞、無線新聞主播、節目主持、審計師、保險從業員、審計師和空中服務員等等，2005年經曾美華介紹下，任職有線新聞台做主播；翌年，轉職TVB新聞台，同時為部分內地新聞作幕後報道。加入TVB未足一年，蔡誌恩就轉職成為全職模特兒，部分工作照更大曬爆肌身材。蔡誌恩近年簽約邵氏旗下，由2007年至今參演過唔少TVB劇集，包括《逆天奇案》、《星空下的仁醫》、《青春不要臉》、新版《十月初五的月光》、《法言人》、《隱門》、《寵愛Pet Pet》、《再見•枕邊人》及《新聞女王》等等，不時被安排律師和檢控官角色，為TVB新一代御用律師。

《黑色月光》監製鍾澍佳（佳導）向來大膽起用新人，今次佢大膽起用蔡誌恩做奸角，所以Vincent喺接受傳媒訪問時亦好感激佳導同埋劇組俾機會佢，佢仲話因為拍攝《新聞女王》時，佳導睇playback見到佢有啲角度同眼神有啲陰險，所以就同佢講話想搵佢做反派角色，令佢有啲反差感，可能會令觀眾有驚喜。

今次蔡誌恩喺劇中擔演重要奸角，所以事前佢都做足功課，不敢怠慢。雖然可以參考嘅劇集唔多，不過佢就好感激郭鋒及林夏薇，因為佢哋幫咗佢好多，佢好記得當中有一幕佢需要陰險又鬼祟，不過佢一開始覺得自己做得唔夠，拍攝完畢嘅郭鋒好好，當時並無離開，仲留低教導佢調整及與導演畀時間佢消化，之後拍兩take就順利完成。而忙碌嘅林夏薇同佢對戲時，亦會好有耐心咁俾意見佢。

劇集出街後，唔少網民都留言讚蔡誌恩演技，例如「奸得來好出色演技唔錯」、「好重戲份，因為係卓昊天得力助手，人靚仔，字正腔圓」、「做得好好，勁sharp」、「演出突出比王浩信及楊明更好！加油！」、「做得唔錯」、「有新鮮感，做得好好」、「奸在骨子裡，演得好好」及「佢真係令我眼前一亮，表現到野心層層遞進，見佢陰陰濕濕對付Vivian 好心涼，哈！」等等。

howardwo

演反派