黃庭鋒全英主持BLACKPINK成員Lisa見面會 網民大讚主持功力：機會真係留俾有準備嘅人

GIRLAV

現年36歲嘅黃庭鋒精通多種語言，當中佢就完成N2日語考試，講得一口流利日語；早於8月份主持TVB巴黎奧運節目期間，翻譯日本乒乓球選手早田希娜嘅奪獎感受，令網民對佢讚不絕口。近日黃庭鋒又為韓國人氣女團BLACKPINK成員Lisa香港見面會《LISA Fan Meetup in Asia 2024–Hong Kong》擔任主持，並全程用英文與Lisa溝通。雖然黃庭鋒坦言呢次係佢最緊張嘅一次，但一班網民都紛紛大讚其主持功力。

黃庭鋒主動發送自我介紹影片到Lisa嘅經理人公司和主辦單位，最後成功被韓國嗰邊選中，連佢自己都難以置信。黃庭鋒於社交平台分享多張當日主持嘅工作照，感謝Lisa與支持佢嘅人，寫道：「當哩件事真係發生既時候，我問左好多次：『係咪真架？』亞洲博覽館、1萬位粉絲、單人匹馬、全英文、而最重要係Lisa is in Hong Kong!!! @lalalalisa_m，今次絕對係我有史以黎最緊張既一次演出，雖然之前同碧咸傾計時都有手震，但係今次既壓力確實好大，好多謝你既友善同熱情，主動同我say hi，令我放鬆，好好享受哩個show，再次感謝你地每一位既歡呼，令到哩個Asia tour有一個完美既句號。」

黃庭鋒又表示是次嘅事前稿主要都係簡單流程，大部分流程係去到現場先決定；不過，黃庭鋒嘅表現獲網民激讚：「雖然無得入場，但在網上睇番片段，你好正，機會真係留比有準備既 (嘅) 人」、「我當日有在場，身邊好多觀眾都大讚你做主持做得好好，唱會氣氛很好，同Lisa之間既互動好睇，多謝你帶比觀眾一場咁好既演唱會」、「沒有想到昨晚的主持居然是你，支持你啊做得好好」、「好掂呀！好有氣氛！well done」、「TVB是要力捧的金牌司儀」、「成件事係型嘅」、「你好叻呀，加油呀」等等。黃庭鋒又大讚Lisa親和嘅一面，指現場保安嚴密，一直都未有機會與Lisa打招呼，但對方於臨出場前主動與佢打招呼；又指難忘喺台上教Lisa講菠蘿包。

howardwo

原來係咁！