林穎彤惹官非致星途危危乎拍片剖白內心分享近況：真係人生如戲

GIRLAV · 發表於 2024-10-4 11:10:10

31歲嘅無綫小花林穎彤（Bella）唔經唔覺入行超過20年，近年向多方面發展，唱歌、拍劇及做主持工作不斷，但上年捲入JPEX案風波及被控「在醫院作出擾亂秩序的行為」罪，有指被TVB「召見」兼暫停所有工作，星途危危乎。去年佢獲香港大學專業進修學院（HKU SPACE）取錄，並修畢「應用營養學及營養補充劑基礎證書」課程。近日Bella喺IG上載兩條影片，直言經過無助、委屈及惡意抨擊，佢反覆思考後成功搵返自己。

近日林穎彤喺IG上載兩條影片分享動向，分別係：「找尋自我之旅 #1「你覺得你清唔清楚你自己啊？」呢兩年經歷嘅事令我脫胎換骨，好似一個全新嘅人咁，我改變咗好多，我夠膽講而家真係幾了解自己！大家成日可能有種感覺，唔知我去咗邊，搞緊乜，個人其實係點？因為真係好少同大家講自己野亦都唔習慣解釋總之就收收埋埋咁啦。經過上天送給我好多人生課題讓我挑戰，然後好彩本人是非常喜歡思考和瘋狂自我覺察的人，我勇敢地大大力翻開左人生新一頁，拋開過往自己俾自己嘅枷鎖，想將我嘅故仔分享俾我IG嘅觀眾，剪咗好幾條片試下睇完會唔會了解我多啲？#同大家講心事個心仔卜卜跳 #未到戲肉 #過幾日有下一條片慢慢睇落去啦 #成套劇咁啊 #真係人生如戲 #其實發生咁多事唔痴線都算係咁 #不過真係好多謝呢啲經歷 #如果唔係仲懵吓懵吓 #方向對了就不怕路長 #有了目標夢想就不遠」.

而第二條片就講到上年8月被落案控告，期間更被困喺羈留室三日，最終擾亂罪名不成立，還佢一個清白。經過無助、委屈及惡意抨擊，佢反覆思考後，佢成功搵返自己，隨著自己目標繼續進發，並話人生嘅新階段正式開始，並寫話：「凡事發生皆有利於我 #一年嘅經歷用90秒講出嚟 #濃縮版 #一切都係最好嘅安排 #如果你經歷緊生活不如意 #身體上精神上覺得好疲憊 #請你相信我一定要堅持落去 #做好自己 #上天會引領你去編寫人生美好的下一章節 #☀️ #而家個新方向我十分熱愛 #令我朝氣勃勃不停探索 #好耐冇試過呢種感覺 #下一條片繼續講」

影片出街後，唔少網民紛紛留言為Bella打氣，例如「人生總會有高有低，有經歷先會成長。為訂立自己嘅目標努力，加油，支持妳」、「有目標，有進步係好事，繼續加油！」、「過去發生嘅事當係俾自己嘅經驗，展望將來。加油」、「加油Bella」、「加油！人生就是這樣！行得正企得正公道在人心」、「永遠支持Bella」、「講得太好，展望將來，明天會更好！」及「加油好欣賞你會去思考兩面」等等。