YouTuber馬米高宣布離開台灣 曾多番批評台灣人好假被勸離開 香港網民反撐：喜歡真性情

GIRLAV

YouTuber馬米高（Michael）為馬蹄露姪子，兩年前到台灣發展兼讀碩士課程，先後擔任小學老師和演藝工作，不過去年就曾拍攝以「『移民台灣三思』台灣人好假～死不認錯～不可直接批評～」為題嘅影片，與赴台10年嘅香港人Jenny大談港台文化差異，鬧出台灣文化衝突事件，馬米高當時直言尚未適應當地生活，力數台灣缺點，直斥台灣人好假又唔尊重他人私隱：「嚟台灣玩下就好啦，定居就真係要諗過度過」，被台灣網民批評無禮貌，更被勸離開台灣。9月30日馬米高上載最新影片，直言要離開台灣，更加講到喊：「喊到成個姑姐咁」，表示自己輸咗：「明星來台兩年一直星途崎嶇，兩年之後最終不敵各種台式思維想法，黯然離開台灣演藝圈，如眾多酸民所願 —『滾回中國香港』～」。

馬米高於影片中表示決定唔留喺台灣發展，指其實畢業後已得到藝術家簽證，仲可以留喺台灣3年，但就選擇唔留低，不過如果有人搵佢拍攝係可以回台拍嘢。馬米高坦言呢兩年經歷好多，但仲有好多唔適應嘅嘢：「嗰種唔慣已經進化到唔會令我唔開心，只會覺得悶悶不樂，好唔知點，唔會帶到畀你活力、靈感，或者帶畀你將來」；佢又重提一年前嘅影片，指當時已講咗大部分喺台灣唔習慣嘅嘢，笑言自己走咗就再無人指出台灣嘅錯誤，更批評台灣人喜愛情緒勒索。事源，台灣節目於上月播出「新一代轉台王大調查」單元中，其中一段馬米高指「看到劉伊心會轉台」嘅VCR掀起網民討論；事後馬米高發聲明指節目組當時指定要佢講出一段針對劉伊心唔禮貌嘅內容以達致節目效果，並承諾會將樣子馬賽克先答應配合拍攝，不過，節目組因溝通上出現問題而未履行承諾。馬米高於影片指，發聲明前已通知負責人會交代事情，未料收到負責人嘅負面評價，指對馬米高好失望和好唔舒服；一開始馬米高都有檢討自己，但後來有台灣朋友直言佢被該負責人情緒勒索：「其實都幾恐怖，因為喺台灣好多時你想得到一樣嘢，你同佢哋講道理係唔會聽嘅，因為呢到嘅人好驚人失望。如果你同佢硬碰硬，佢又會覺得無面，唔會妥協」。

不過馬米高好感謝台灣畀佢嘅一切，包括經驗、新朋友，亦令佢更了解自己想要及唔想要啲咩，講到要用紙巾抹眼淚，更加抹到有紙巾痴住喺眼皮到：「雖然我好多嘢都睇唔順眼，但我都好感激遇到好好嘅人，點解會喊嘅？黐線」，馬米高指呢啲都係開心眼淚，表示雖然畀人鬧到咁慘，遇到好多唔同嘅嘢，好多難題，但會帶住回憶走：「我唔知點解我會喊，黐線，點解我會喊嘅，有問題」。最後，馬米高表示：「我愛台灣，謝謝台灣，明星滾回中國香港，如你哋所願，以後唔會再有人話你哋錯架啦，以後嘅一切大家只會講好棒棒、好可愛」。馬米高於影片下留言：「無論好壞經歷，到最後都會是人生中有價值的經驗。我是不認同某些台灣的東西，但我感謝台灣給我的一切～明星還是愛你們的， 謝謝華語市場！」。

唔少網民都表示欣賞馬米高嘅真性情：「有100個憎你，但係你望下後面，你唔知道有10萬個鍾意你。只係平時潛水冇表態姐～加油馬老師」、「較真既人路係難行啲」、「完全明白你既踩唔係真係踩，有時指出問題唔代表你唔中意果個地方」、「你係一個敢言的人，我欣賞你」等等。

LasCases

係就快D。

howardwo

又係『乜水』？！