福祿壽訓練學院｜阮兆祥李思捷再惡搞何伯及新何太拍埋「千語BB語錄」教釣金龜

GIRLAV · 發表於 2024-5-20 16:26:59

何生與新何太成為城中熱話，李思捷及阮兆祥早前於扮嘢真人騷《福祿壽訓練學院》模仿何生與新何太，化身「鵝伯」、「新鵝太」並亂入《逆天奇案2》大結局現場，網民大讚二人極速「抽水」，神還原何生與新何太打扮及講嘢語氣。5月19日晩播出第6集《福祿壽訓練學院》，李思捷及阮兆祥緊貼何生與新何太事件發展，再次扮演二人上《東張西望》一幕，仲搵嚟節目「扮工室助理」郭珮文（Juliana）扮演被觀眾大讚追問技巧厲害嘅「東張女神」梁敏巧。

李思捷、阮兆祥、郭珮文穿上與何生與新何太、梁敏巧超級相似嘅服裝造型拍攝，包括阮兆祥嘅黑長髮假髮、星星黑白裙、絲巾，二人大讚TVB服裝、道具及化妝同事喺咁短時間搵到一模一樣嘅衫同絲巾相當犀利及勞苦功高。廠景以外，今次仲有Canteen、提款機、花叢嘅場景，加上阮兆祥全程以小鳥伊人Tone對住李思捷又挨又撒嬌，神還原何生與新何太訪問情節，笑料百出。

節目仲有幾個爆笑位，其中郭珮文問到新鵝太嘅手袋係咪A貨，新鵝太就指全部都唔係A貨，A貨只得一個，仲伸手入連身裙中拎出個蘋果：「A For Apple」，「新鵝太」又拎出訂情信物「神秘手扣」，表示鵝伯用手扣鎖住佢，希望下世都喺埋一齊。另外，阮兆祥又模仿何太抖音影片「千語BB語錄」教觀眾釣金龜、鵝太囝囝更加唱一曲送贈媽咪和叔叔、鵝伯與新鵝太到古惑提款機提款、花叢漫步等情節都令觀眾捧腹大笑。除此之外，細心一睇鵝伯嘅家庭照，王祖藍原來都有份演出，一人飾演鵝伯嘅大仔、大女、二女和細女。網民紛紛大讚節目組跟劇情跟得好貼，李思捷及阮兆祥嘅扮嘢演技亦令佢哋笑到肚痛：「演繹得好好，真係世紀喜劇」、「真係最似係你哋，最正係連啲家人合照同埋，何太教授釣金龜教學片都神還原」、「福祿壽你哋真係100%神還原，搞笑，令到我笑得好大聲，期待你哋嚟緊更出色嘅扮嘢」、「相信係TVB近十年最好笑既短劇」、「拍果陣要點樣至可以忍住唔笑？」、「兩人都扮得維妙為肖，真係笑死人了」等等，又有網民留意到阮兆祥扮演新鵝太接受郭珮文訪問期間，故意張開對腳嚟企，令到拍出嚟唔會高過郭珮文，更貼近何太與梁敏巧嘅高度。