中年好聲音2｜狄波拉化身小粉絲捧足兩晚場譚輝智受寵若驚

GIRLAV · 發表於 2024-4-20 10:10:17

TVB歌唱選秀節目《中年好聲音2》冠亞季軍喺月尾出爐，節目好評如潮，連帶一班參賽者人氣爆升。近日18位中二生順利完成一連兩場《中年好聲音2隆重登場慈善演唱會》，演唱會觀眾席爆滿，吸引唔少粉絲捧場，當中包括入場支持「人氣王」譚輝智嘅狄波拉（拉姑），而且仲精心準備驚喜送畀譚輝智。

《中年好聲音2》亞軍得主譚輝智，喺比賽期間已經得到唔少粉絲支持，更被形容為新一代「師奶殺手」，人氣高企。早前拉姑被甄珍姐姐爆係譚輝智嘅粉絲，自此佢嘅追星行蹤就備受關注。近日舉行嘅《中年好聲音2隆重登場慈善演唱會》，拉姑當然把握機會入場一睹偶像風采，期間佢表現興奮，仲有機會同譚輝智握手同抱抱。

之後，拉姑仲跟好友曾志偉出席慶功宴，拉姑除咗同譚輝智搭膊頭同傾計之外，佢仲精心準備咗一個偶像嘅人形figure送畀譚輝智。對於得到拉姑嘅喜愛，譚輝智喺接受傳媒訪問時就表示受寵若驚並感謝佢嘅支持，表示會努力繼續唱歌，搞笑話希望拉姑唔好咁快變心。拉姑喺接受傳媒訪問時，被問到點解鍾意譚輝智，佢就話冇得解釋，佢首首歌都好鍾意，之後佢就好似小粉絲咁低頭面紅。