林明禎新居擁落地大窗連露台夠氣派搞笑留言「歡迎任何家具贊助」

GIRLAV · 發表於 2023-2-22 12:00:58

近年喺香港非常活躍嘅林明禎，早前宣布搬離台灣定居香港。近日佢喺社交網站上載新居環境嘅照片，從照片中可見，明禎BB新居疑似位於跑馬地，屋企暫時未有任何傢俬及擺設，不過就設有近落地大窗及玻璃趟門，外連寬倘嘅露台。而佢就搞笑喺圖片寫上「歡迎任何家具贊助」，並貼上浴缸、梳化、床及電視機等卡通圖案，真係好識精打細算呀！

林明禎新居環境喺社交網站首度曝光，雖然佢冇公開新居嘅位置，不過就被指疑似位於跑馬地。從照片中可見，新居暫時未有任何傢俬及擺設，單位客廳旁設有獨立房間，有落地大窗及玻璃趟門，外連景觀開揚嘅大露台。早前林明禎曾經提過自己鍾意景觀開揚、靠山、有大玻璃窗及露台嘅住所，相信今次新居應該滿足到佢大部份嘅要求啦！

32歲「大馬女神」林明禎擁有天使面孔及魔鬼身材，憑住性感又可愛形象，成為新一代性感女神，俘虜唔少粉絲。除咗獲唔少廣告商同電影公司垂青之外，林明禎進軍香港影壇，拍咗唔少影視作品，好似去年參與電影《飯氣攻心》，憑一句「親一個，好嘢！」配上招牌動作，更引發模仿熱潮，人氣及吸金力簡直爆燈。