阿仙奴新兵係「體能王」　狂創訓練場紀錄

小哥阿四 · 發表於 2023-2-4 10:36:02

本帖最後由小哥阿四於 2023-2-4 14:56 編輯

阿仙奴喺冬季轉會窗簽入3名新兵，由英超球會收購嘅李安度杜沙特同佐真奴都係球迷熟悉嘅球星，反而波蘭中堅積及基奧柯較為陌生，不過呢位22歲新星原來唔簡單，據報佢加盟後操練着晒火，更打破多項球會內部訓練紀錄，值得留意。

積及基奧柯由意甲嘅史柏斯亞加盟，上場英足盃已經坐後備席但未有登場，據《London World》報道，佢喺練習期間展現驚人運動力，接連打破短途衝刺、敏捷跳躍同站立跳躍3項球會紀錄。據報比利連喺2015年以4.41秒完成40米衝刺，打破禾確特嘅紀錄，有傳呢個紀錄之後又被基蘭泰亞尼打破。

積及基奧柯經理人表示，阿仙奴早喺卡塔爾世盃前已經同佢哋進行斟介，而祖雲達斯、AC米蘭同拿玻里都向史柏斯亞提出收購，不過呢位波蘭國腳就一心加盟阿仙奴，令轉會可以順利達成。