卻奧斯拒絕沙特利誘

小哥阿四 · 發表於 2023-1-7 10:21:42

繼簽入C朗之後，沙特阿拉伯豪門艾納斯亦有意簽入皇馬中場卻奧斯，但呢位剛於1月4日度過33歲生日嘅德國名將拒絕利誘，並願意同「艦河艦隊」續約1年，因為希望「有體面」結束球員生涯。

卻奧斯將於今夏約滿，但仍未同皇馬達成續約協議，傳出唔少中東富豪球會有興趣簽入佢，包括星光炄熠熠嘅艾納斯。不過，卻奧斯表明，冇考慮過去中東掘金，甚至如果未能效力歐洲傳統大球會，佢寧願今夏就掛靴。

皇馬基於慣例，只會同老將續約1年，並已向卻奧斯開出1年新約，佢正在積極考慮當中，如無意外將會接受續約。皇馬教練安察洛堤亦話，有信心卻奧斯會留隊：「實在唔敢想像卻奧斯咁優秀嘅球員今夏退休，我相信佢會留喺皇馬延續球員生涯，亦係佢自己嘅願望。」

卻奧斯2014年由拜仁慕尼黑轉投皇馬以來，協助球隊奪得3次西甲、4次歐聯及4次世冠盃等多項冠軍，今季仍然係主將，各項賽事上陣19場入1球。