【世盃係咁睇】為決賽好戲碼感恩

小哥阿四 · 發表於 2022-12-18 10:03:58

世盃係咁睇，係咁樣睇，起勢睇，講吓講吓差唔多一個月，終於嚟到「完結篇」，唔知係法國定阿根廷3奪世界盃，只知喺球迷立場，呢個戲碼相當唔錯，呢兩隊波近年一直處於高水平，對賽令人期待。
撰文：球十三法國連續兩屆入決賽，代表隊波水準好穩定，其實睇番上年歐洲國家盃，高盧雄雞都係領先下鬆懈至俾瑞士追平然後輸12碼。今屆決賽周前冇干堤、冇普巴，好似「讓賽」依然強勢，喺安巴比領銜出賽幾乎勢如破竹，普天之下難尋對手。

難啫，唔係冇，阿根廷就係。

阿根廷由2014世界盃到今屆，其實踢過好多次大賽決賽，去到舊年終於擺脫二奶命，今屆一開波就甩轆，但之後上力。好同意名帥卡比路所講，美斯之前好似踢到散步咁，去到4強對克羅地亞至多番盤扭，嚟到尾段先出真力，呢啲就係球王本色。

就睇美斯同安巴比嘅王者對決，已經夠睇頭。

臨近聖誕，呢個確係一個快樂同感恩嘅時節，即管睇邊隊可以過快樂聖誕，而我哋球迷真係感恩，將有呢場咁強球味嘅壓軸好戲。最後一場啦，一齊陶醉世界盃！