英足總上訴成功　高普今晚停賽

小哥阿四 · 發表於 2022-11-13 10:13:51

利物浦領隊高普上月英超對曼城，因為向旁證作出激烈抗議，被出示紅牌趕出場，原本只被判罰3萬鎊，唔需要停賽，但英格蘭足總認為判罰太輕，上周五(4日)提出上訴，經過獨立委員會聆訊之後，決定判罰呢位德國名帥停賽1場，意味周六(12日)晚英超利物浦主場對修咸頓，高普無法喺場邊親自指揮球隊比賽。

該場「利曼」大戰踢到86分鐘，紅軍前鋒穆罕默德沙拿被對手貝拿度施華侵犯，但球證安東尼泰萊並冇吹罰，令到高普非常不滿，向旁證Gary Beswick怒吼抗議，結果換來1張紅牌。

當時外界都以為高普會被罰停賽，但結果只係話佢違反足總E3條例，判處罰款3萬鎊，高普亦承認自己當時行為不當。英格蘭足總提出上訴，最終令高普需要停賽1場。

利物浦近3次對修咸頓，都成功贏波，相信高普今場停賽，球員應該識自己執生。