不滿熱刺球迷柴台　干地：再噓我劈炮！

小哥阿四 · 發表於 2022-11-9 11:27:34

熱刺上場聯賽主場1比2輸畀利物浦，近3仗主場1和2負，差勁表現連熱刺球迷都頂唔順，喺半場同完場向球隊報以噓聲，不過呢個行為就令領隊干地非常不滿，表明如果熱刺球迷繼續咁樣做，佢會考慮今季之後離隊！

干地喺輸畀利物浦後，講到被自己球迷狂噓一事，呢位意大利主帥話：「買飛入場支持球隊嘅球迷係要尊重，但老實講我好失望，過去1年球隊已經有好大進步，但如果佢哋覺得可以捧盃，我嘅答案係『好難』，所以每個人都要明白同埋有耐性，否則(噓聲)會摧毀球員嘅熱情同激情，呢啲都係我最重要嘅燃料，如果我得唔到呢啲燃料，到季尾我會再睇下點樣做。」

干地同熱刺嘅合約去到季尾就完結，續約談判亦遲遲未有進展，而且今次已經唔係干地第一次威脅會離隊，有傳佢仍然希望重返意甲執教，目前喺倫敦亦只係住酒店，似乎未有長期留低嘅計劃。