紐亞自爆患皮膚癌　曾做3次手術

小哥阿四 · 發表於 2022-11-4 12:27:59

德國國家隊門將紐亞周四(3日)喺社交網公開震撼消息，佢證實早前患上皮膚癌，並且已經進行3次手術，據報紐亞依家已經康復，近期係因為膊頭傷患而缺陣，不過近日亦開始操練，有望趕及世界盃前復出。

36歲嘅紐亞喺社交網宣布，佢同德國女子網球手姬芭一齊投資研發一種防曬霜，紐亞表示：「我哋都曾經患過皮膚上嘅疾病，姬芭係有由太陽引起嘅皮膚色素紊亂，我嘅個案係面部患皮膚癌，並且已經做過3次手術，所以我哋特別注重防曬同皮膚保護。」

德國《圖片報》報道，紐亞得知患癌後仍堅持比賽，上年11月對比勒費爾德嘅聯賽，佢被影到面上貼上膠布，當時佢喺啱啱做完手術。消息指紐亞目前已經康復，呢位曾113次為德國國家隊把關嘅門將，預計將會再為德國出戰世界盃決賽周。