世盃第1隊公布名單　日本唔預古橋亨梧

小哥阿四 · 發表於 2022-11-2 10:53:27

日本國家隊周二(1日)公布世盃26人大軍名單，成為今屆決賽周首支公布決選名單嘅球隊。日本主帥森保一今次點兵有爭議，些路迪前鋒古橋亨梧意外落選，有傷在身嘅淺野拓磨同板倉滉就有份入圍。

古橋亨梧今季喺蘇超狀態大勇，10場聯賽入8球排蘇超射手榜次席，落選世盃大軍令人意外，而更加估唔到嘅係，些路迪另一前鋒前田大然就有份參賽。日本一眾外流球星好似富安健洋、南野拓實、久保建英等就一如所料入選。

日本26人名單

門將：川島永嗣、權田修一、丹尼爾舒密特

後衞：長友佑都、吉田麻也、酒井宏樹、谷口彰悟、山根視來、板倉滉、中山雄太、伊藤洋輝、富安健洋

中場：柴崎岳、遠藤航、守田英正、鐮田大地、田中碧

前鋒：伊東純也、淺野拓磨、南野拓實、相馬勇紀、三笘薰、前田大然、堂安律、久保建英、上田綺世