盛傳皇馬關注孫興民　熱刺面臨星散

小哥阿四 · 發表於 2022-10-26 20:53:42

熱刺上仗不敵紐卡素，雖然只係一場敗仗，但迴響超乎想像，主帥干地遭質疑戰術保守，浪費進攻人才，傳媒再爆出孫興民受皇馬關注，加上拜仁垂青哈利卡尼傳聞揮之不去，熱刺星散危機隨時引爆。

最新傳出嘅不利傳聞係孫興民有意轉會，英國《每日郵報》報道，上季取得英超神射手殊榮嘅孫興民今季出現入球荒，一度被貶為後備，消息指「孫仔」開始為前途打算，盛傳皇馬主帥安察洛堤正密切關注這位南韓前鋒動向，有機會過檔皇馬。

孫興民在熱刺7年，30歲嘅佢步入足球員黃金時期，今年金球獎排11位，創下亞洲球員最高紀錄，係時候挑戰更大舞台，熱刺不敵紐卡素後，球隊被批評無力爭冠，如果哈利卡尼明年夏天轉投拜仁，孫興民過皇馬亦合理。

皇馬及孫興民能否合作，卡塔爾世界盃將是契機，南韓喺世盃與加納、烏拉圭、葡萄牙同組，只要孫興民能展示世界級射手水平，不愁轉會機會。