車路士1月再斟C朗　今次冇人阻保利？

小哥阿四 · 發表於 2022-10-25 10:50:12

C朗拿度早前喺英超發脾氣提早離場，受到曼聯領隊坦哈格紀律處分，雙方關係陷入新低點，1月「分手」似乎事在必行。據英國《每日郵報》報道，車路士班主保利同C朗經理人佐治文迪斯關係密切，準備1月再次出手斟介。

車路士嘅美國班主保利，一直視C朗為「夢幻收購」，今個夏天就曾經同佐治文迪斯會面斟介，不過當時領隊杜曹堅決反對，令交易未能實現，不過呢位德國教頭已被炒魷，盛傳「反對簽C朗」都係杜曹嘅「死因」之一，唔知新帥樸達會唔會成為收購C朗嘅「攔路虎」。

事實上，車路士目前只有奧巴美揚同布查兩位正箭頭，不過奧巴美揚嘅表現仍然飄忽，布查又未夠「卡士」擔起大旗，對於要喺英超同歐聯逐鹿嘅車路士，簽入星級前鋒都係有需要。