C朗隔空為隊友打氣　坦哈格堅持處分合理

小哥阿四 · 發表於 2022-10-24 10:41:12

曼聯作客1比1逼和車路士，葡萄牙球星C朗拿度雖然被處罰式棄用，不過佢亦冇懷恨在心，今仗開波前特別喺社交網貼出同隊友慶祝嘅相片，留言「Let's Go！」為曼聯打氣，似乎已經知道自己「鬥」唔過坦哈格嘅權威，準備再次投入球隊。

曼聯今場喺補時先執番1分，如果輸波嘅話，棄用C朗嘅決定勢必被大造文章，但坦哈格賽後表示就算今場輸波，都唔會後悔處分C朗嘅決定：「卡斯米路入波非常重要，為曼聯拎到應得嘅1分，呢個入波同嗰件事(處分C朗)冇關，我嘅決定係要建立正確嘅文化同價值觀，長遠嚟講對球隊係更加重要，會帶領我哋走向正確嘅道路。」