祖普莫亭又入波　向羅拔仔下戰書！

小哥阿四 · 發表於 2022-10-23 20:13:20

拜仁慕尼黑重拾霸氣，佢哋周六(22日)作客2比0擊敗賀芬咸，各項賽事再次錄得4連勝，喀麥隆中鋒祖普莫亭勇態持續，連續第3場有波入，周中歐聯作客巴塞隆拿前，更向昔日正選羅拔利雲度夫斯基「下戰書」！

拜仁近提拔祖普莫亭做正選後，成功填補「羅拔仔」離隊嘅中鋒空缺，球隊亦愈踢愈順，今場17分鐘就由穆斯亞拿窄角度抽入領先，38分鐘祖普莫亭禁區頂分波去邊線，自己再走入禁區接應基拿比傳中射入，拜仁之後一直控制戰局，最終贏2比0完場。

喺歐聯已經出線嘅拜仁，周四(27日)凌晨會作客巴塞隆拿，將會面對倒戈嘅羅拔利雲度夫斯基，不過之前做佢後備嘅祖普莫亭就信心爆棚話：「我好期待再次對羅拔仔對陣，佢係世界級前鋒。我對自己嘅能力一直好有信心，近期連環入球冇乜秘密可言。」