難抵奪冠誘惑　哈利卡尼願投拜仁

小哥阿四 · 發表於 2022-10-20 10:24:31

德國《天空體育》報道，熱刺射手哈利卡尼願意加盟拜仁慕尼黑，不過熱刺仍然係佢首選，轉會關鍵係明年夏天，因為哈利卡尼同熱刺尚餘兩年合約，如果仍未續約，熱刺好大機會明年夏天將佢出售。

羅拔利雲度夫斯基今夏離隊，拜仁原本有意挖角哈利卡尼代替，但未能成事，唯有再等機會；之前德媒報道，拜仁願意為哈利卡尼支付1億歐元轉會費，如果明年夏天斟介，喺哈利卡尼尚餘1年合約情況下，希望以一個相對合理價錢簽入該射手。

報道指，哈利卡尼仍未決定同熱刺續約，如果轉投拜仁，對佢足球生涯係重大轉機，至少可以穩奪德甲，歐聯亦係爭標份子，而且可以轉換新環境，對佢嚟講好有吸引力。

哈利卡尼今季狀態重回高峰，據英超官方統計，哈利卡尼近5仗聯賽連續士哥，創下個人英超連續入球紀錄；佢今季各項賽事上陣14場攻入10球2助攻，不過表現幾好都冇用，熱刺近年捧唔到盃，係佢無法抵抗拜仁誘惑嘅原因。