艾歷臣倒戈熱刺成疑　干地唔認爭輸畀曼聯

小哥阿四 · 發表於 2022-10-19 10:20:22

曼聯會喺周四(20日)凌晨英超主場對熱刺，焦點人物係中場基斯甸艾歷臣，呢位丹麥國腳今夏「背叛」熱刺加盟曼聯，即時成為熱刺球迷公敵，不過今場倒戈戰就因病未必能夠上陣。熱刺領隊干地賽前就唔肯證實夏天有冇向艾歷臣提出邀請，唔認爭輸畀曼聯。

艾歷臣曾經效力熱刺7年，期間更曾承諾「唔會效力熱刺以外英超球隊」，今夏落實轉投曼聯後，有球迷拍片焚燒艾歷臣嘅熱刺波衫，以示對佢違背承諾嘅不滿。但熱刺球迷今場未必見到艾歷臣，事關佢早前因病缺陣，曼聯領隊坦哈格賽前表示：「我唔肯定佢趕唔趕得切復出，我當然想佢候命，佢對曼聯好重要。」

干地同艾歷臣曾經喺國際米蘭共事，賽前佢被問到夏天係咪爭艾歷臣輸畀曼聯，佢就回應：「我好享受同艾歷臣合作，亦希望有機會再訓練佢，熱刺有冇出手(斟介)並唔重要，佢為自己作出一個重大選擇(加盟曼聯)，我會祝福佢有好表現，除咗對熱刺嘅賽事。」