祖奧菲歷斯怒掟龜背　最快1月要求轉會

小哥阿四 · 發表於 2022-10-14 19:01:17

馬德里體育會周四(13日)凌晨歐聯賽事，主場只能夠同布魯日踢成0比0平手，出線機會大打折扣，比賽期間更發生不愉快場面，葡萄牙前鋒祖奧菲歷斯不滿多次熱身後未獲派上陣，公然怒掟「龜背」洩忿！祖奧菲歷斯近期進入教練施蒙尼冷宮，傳聞佢打算1月就轉會。

馬體會喺歐聯B組只排第3位，主場對布魯日急需3分救亡，當比賽一直僵持，施蒙尼下半場亦盡遣攻擊球員入場，不過喺79分鐘，施蒙尼將最後一個換人名額用喺韋素入替基沙文後，熱身咗一大段時間嘅祖奧菲歷斯即刻大發脾氣，將龜背掟落地後嬲爆爆咁坐返後備席。

祖奧菲歷斯近4場賽事只係踢咗29分鐘，賽前施蒙尼被問到祖奧菲歷斯係咪有乜改變，呢位教頭就話：「佢冇變，只係其他球員比佢踢得更好。」據葡萄牙傳媒消息，祖奧菲歷斯明白施蒙尼下季都會繼續帶隊，所以佢亦準備提出轉會要求，有機會嘅話明年1月就可以走人。