受膝傷困擾　39歲列貝利即將宣布收山

小哥阿四 · 發表於 2022-10-9 10:32:58

法國著名翼鋒列貝利自從8月今季意甲首輪賽事為沙蘭力坦拿上陣對羅馬之後，一直養傷，根據法國《隊報》爆料，呢位39歲老將嘅膝傷問題未有好轉，仍然感到痛楚，好可能會喺短期之內，宣布掛靴，結束22年職業球員生涯。

列貝利曾經效力梅斯、加拉塔沙雷、馬賽、拜仁慕尼黑等球隊，最威水一定係效力拜仁慕尼黑12季期間，9次奪得德甲冠軍，仲有1次歐聯及1次世冠盃等多項錦標。列貝利3年前離開拜仁，轉戰意甲，加盟費倫天拿，效力2季上陣51次入5球。

呢位曾經為法國國家隊上陣81場入16球嘅球壇長青樹，一向唔認老，上季加盟沙蘭力坦拿，繼續球員生涯，但表現力不從心，上陣23次並冇波入，今季踢1場就養傷。

據悉列貝利原本打算等今季結束之後，自己年滿40歲先至退休，但依家可能要提早宣布收山。